Ғарбий Африканинг Гана давлатида ўлимга олиб келувчи Марбург вируси билан илк касалланиш ҳолатлари аниқланганди. Шундан сўнг ушбу вирусга чалинган 26 ва 51 ёшли икки киши вафот этган. ЖССТнинг маълум қилишича, мамкалатда болалар орасида Марбург вирусидан илк ўлим ҳолати қайд этилди.
«Ганада Марбург вируси билан касалланган бола вафот этди», — дейилган ЖССТ хабарида ва тафсилотлар маълум қилинмаган.
Маълумот учун, Марбург вируси Эбола сингари ўта юқумли бўлиб, ҳозирча тасдиқланган даво муолажалари мавжуд эмас. Қолаверса, бу хасталикка қарши вакциналар ҳам яратилмаган. Шунга қарамай, баъзи экспертлар Эбола дорилари Марбургни даволашда самара бериши мумкинлигига ишонади.
Жаҳон соғлиқни сақлаш ташкилоти маълумотларига кўра, хасталик аломатлари тўсатдан бошланади ва бемор юқори тана ҳарорати, кучли бош оғриғи ҳамда безовталикдан азият чекади. Мушакларда оғриқлар кучайиб, тез-тез судирги юз беради. Қолаверса, ганалик икки беморда диарея, кўнгил айниши ва қайт қилиш ҳолатлари ҳам кузатилган.
Касалликнинг бешинчи кунида кўкрак, орқа ва қорин бўшлиғида тошмалар пайдо бўлиши мумкин. Оғир вазиятларда эса саккизинчи-тўққизинчи кунга бориб ўлим ҳолати содир бўлади. Ҳозир Гана ҳукумати вирус тарқалишининг олдини олиш юзасидан барча зарур чораларни кўрмоқда. Беморлар билан мулоқотда бўлганлар қатъий карантинга олинган. Шунингдек, Жаҳон соғлиқни сақлаш ташкилоти бир гуруҳ мутахассисларини ушбу мамлакатга сафарбар этяпти.
«Бу жараёнда тезкорлик жуда муҳим, — дейди ЖССТнинг Африка минтақавий бюроси раҳбари Мацҳидисо Моэти. — Чунки зудлик билан қатъий чоралар кўрилмаса, Марбург осонгина назоратдан чиқиб кетади. Биз ҳозир шунга эришяпмиз».
Таҳлилларнинг тасдиқлашича, Марбург вируси инсонлар ўртасида тана суюқликлари (қон, тупик, пешоб) билан бевосита алоқа қилиш, шунингдек, турли жисмлар юзалари орқали фаол тарқалиши мумкин.
Изоҳ (0)