Xonanda Tatyana Zayseva “Yashin TV” YouTube kanaliga bergan intervyusida bir muddat “Sharq” guruhidan alohida ijod qilgani hamda duetdoshi, turmush o‘rtog‘i Sarvar bilan ajrashmoqchi bo‘lgani haqida so‘zlab berdi.
— Ketma-ket uch nafar farzandli bo‘ldim va umuman dam olmadim. Har kuni to‘y, bayram, korporativlarda chiqish qilaverish meni juda toliqtirdi. Bir muddat dam olishga qaror qildim. Guruhdan ketdim, sayohat qildim, to‘g‘ri ovqatlanish va sport yordamida vaznimni kamaytirdim. Ma’lum muddat dizaynerlik sohasida faoliyat yuritib, o‘z salonimni ochdim. To‘y va oqshom liboslari saloniga asos soldik. Yakkaxon ijodimni boshladim. Aslida, “O‘zbegim yoshlari” ansamblida men yakkaxon xonanda edim. Sarvar aka bilan ham o‘sha yerda tanishganmiz.
Har bir inson hayotida shunday bosqich bo‘ladi: siz ko‘zlagan maqsadlaringizga erishdingiz, hamma narsangiz bor, lekin shunda ham nimadir yetishmayotganday tuyuladi. Dunyo rang-barang, inson bir joyda qotib qolmasligi kerak. Menda ham shunday bo‘ldi. Yarim yil ichida bir nechta yakkaxon ijod namunalarimni chiqardim, ko‘pchilikka manzur bo‘ldi, deydi Tatyana.
— Mendagi tushkun kayfiyat uch yil avval boshlangan. O‘shanda o‘zimni topa olmayotganimni his etganman. Bu haqda Sarvar akaga aytganimda rosa hayron bo‘lgan. “Senga nima yetmayapti, hamma narsamiz bor. Har kuni odamlar orasidamiz, har kuni hayotimiz bayram, to‘y”, degan. Lekin insonlarga bayram kayfiyatini berish uchun sizning o‘zingizda kayfiyat yuqori bo‘lishi kerak. Menda esa buning aksi. Sarvar akam bu vaziyatda meni tushunganlar. Men bundan juda minnatdorman. Chunki hamma narsasi bo‘la turib, yana nimadirlarni izlaydigan ayolni hamma ham tushuna olmaydi.
Yaqinda Sarvar aka bilan ajrashamiz deb “ZAGS”ga bordik. Ikki soat o‘sha yerda gaplashib turdik. Keyin men “Sarvar aka, bugun siz bilan ajrasha olmaymiz. Ajrashish uchun to‘g‘ri kelmaydigan kiyimdasiz. Futbolkangizni qarang, juda kulgili”, dedim. Ularning futbolkalarida kichkina bolaning rasmi bor edi. “Sizga qarab jiddiy gapira olmayapman. Futbolkangiz hamma rejani barbod qildi”, dedim. Shundan keyin ular kulib yubordilar va biz uyga ketdik. Hozir hammasi yaxshi. “Sharq” guruhi yana qayta tiklandi va biz birgalikda to‘ylarga chiqyapmiz, deya so‘zlarini davom ettiradi xonanda.
Izoh (0)