Зироат Мирзиёева амбулатор шароитда даволанаётган ва узоқ вақт мактабга қатнай олмайдиган болалар учун “Меҳрли мактаб” госпиталь мактаби филиалида бўлди. Бу ҳақда “Замин” халқаро жамоат фонди хабар берди.
4 сентябрдан бошлаб Болалар онкологияси, гематологияси ва иммунологияси илмий-амалий тиббиёт маркази ҳузуридаги биринчи амбулатория мактабида бошланғич ва мактабгача таълим бўйича дарслар ўтилмоқда, турли йўналишларда ривожлантирувчи тўгараклар фаолият юритмоқда, болалар арт-терапия билан шуғулланмоқда.
Бундан ташқари, болалар, ота-оналар ва ўқитувчилар учун психологик-педагогик ёрдам хизмати ҳам йўлга қўйилган. Мактабнинг барча мутахассислари госпиталь шароитда ишлаш бўйича махсус тайёргарликдан ўтди.
Мактабга ташриф чоғида “Замин” фонди Васийлик кенгаши раиси болалар ва ота-оналар билан самимий суҳбатлашди, педагогларни Ўқитувчи ва мураббийлар куни билан табриклаб, ўз олижаноб вазифасига кўрсатаётган меҳри учун уларга чуқур эҳтиром ва миннатдорлик билдирди.
Изоҳ (0)