Тошкентда 2–4 октябрь кунлари Креатив иқтисодиёт бўйича тўртинчи бутунжаҳон анжумани ўтказилиши ҳақида хабар берилганди. “Менимча” кўрсатувида мамлакат учун ижодий иқтисодиёт жуда муҳимлиги ва бунинг сабаблари айтилди.
Маълум қилинишича, ижодий иқтисодиётнинг дунё иқтисодиётидаги улуши бу йил 1,5 триллион долларга яқинлашди ва бу улуш жадал ўсишда давом этяпти. Ўзбекистон учун ҳам ижодий иқтисодиёт жуда муҳим.
Энг аввало, ижодий иқтисодиёт учун масофа ва логистика муаммо бўлолмаслиги айтилган. Ўзбекистон иқтисодиётининг энг катта муаммоси, бу – денгизга чиқадиган йўлимиз йўқлиги. Мамлакат чет элга сотаётган маҳсулотини ўз манзилига етказишда сув йўлига нисбатан анча қимматга тушаётган ер усти ва ҳаво логистикасидан фойдаланмоқда.
Бу эса маҳсулотнинг таннархи ошиб кетишига, халқаро бозорда рақобатбардош эмаслигига сабаб бўлади. Бугунги дунёда битта IT дастурчи бирор хориж компаниясининг логотипини ясаб, ўша компанияга фалон пулга сотиши учун ҳеч қанча вақт ҳам кетмайди, онлайн жўнатади қўяди.
Иккинчидан, иқтисодий диверсификация бўлиш шарт. Чет элга сотадиган маҳсулотнинг асосини қишлоқ хўжалиги ва ёки хом ашё ташкил этишига чек қўйиш кераклиги таъкидланди. Ўзбекистон ўзининг ижодий ва ақлий маҳсулотини чет элга сотиш билан халқаро ҳамкорликни кучайтириши ва валюта тушумларини ошириши мумкин.
Учинчидан, аҳолининг катта қисмини ёш авлод ташкил этяпти. Яъни бу – янги ғоя ва максимал интилишга эга бўлган қатлам. Ва бу қатлам ишлаши лозим. Меҳнат майдонига йилига 600 мингтадан йигит-қиз келяпти. Катта заводлар қурмасдан туриб ҳам, ёш авлоднинг ижодий-интеллектуал ўсиши ва бунинг натижасида яхши пул топиши учун инфратузилма яратишга куч сарфлаган маъқул экани айтилди.
Тўртинчидан, ижодий иқтисодиёт таълим, кино, санъат, маданий меросни ривожлантиради ва бу орқали ижтимоий онг ва маданият ҳам ўзгариб боради.
Ўзбекистонда ҳам ана шундай “ижодий иқтисодиёт” кенг ёйилиши ва жадал ишлаб кетиши устида катта иш бошланмоқда. Яқинлашиб келаётган IV бутунжаҳон креатив иқтисодиёт анжуманида Ўзбекистон бу йўналишдаги ўзининг дастлабки натижалари ва мақсад-муддаоларини эълон қилади.
Бундан аввал Шавкат Мирзиёев раислигида ёшлар сиёсати соҳасида амалга оширилган ишлар сарҳисоби, ёшларни ҳар томонлама қўллаб-қувватлаш чора-тадбирлари юзасидан видеоселектор йиғилишида ҳар бир вилоятдаги биттадан Баркамол авлод марказида Креатив саноат парклари ташкил қилинишини айтилганди. Уларга IT-Парк резидентлари учун назарда тутилган имтиёзлар берилади.
Изоҳ (0)