Самарқанднинг “Динамо“ футболчиси Жоэл Кожо Эроннинг “Истиқлол” клубига ўта олмагани ортидан клуб бош мураббийи ва раҳбариятини кескин танқид остига олди.
2023 йилдан бери “Динамо” сафида ўйнаётган қирғизистонлик футболчига Жалолиддин Машарипов ҳаракат қилаётган Эроннинг “Истиқлол“ клуби қизиқиш билдирган. Маълум бўлишича, спортчи Эрон клубига розилик билдирган, Самарқанд клуби ҳам аввалига трансферга қаршилик қилмаган. Аммо Эронда трансферлар ойнаси ёпилишига бир кун қолганида Эрон клуби Ўзбекистон клубига боғлана олмаган. Оқибатда трансфер амалга ошмаган.
“Аллоҳ уларнинг менга қилган ишини ҳеч қачон кечирмайди. Мен футболдан умидимни уздим, йигитлар, футбол ўйнашга кайфиятим йўқ”, дея Кожо сўзларини келтиради Sports нашри.
Футболчининг рафиқаси маълум қилишича, мавсум бошида Абрамов 100 минг АҚШ доллари тўлаган исталган жамоага қўйиб юборишни ваъда қилган. Эрон клуби эса 300 минг АҚШ доллари таклиф қилгани маълум бўлди.
Ўз навбатида Самарқанд клуби матбуот хизмати вазиятга изоҳ берди.
“Динамо” ПФК шуни маълум қиладики, дарҳақиқат Эрондаги трансфер ойнасининг сўнгги кунида жамоамиз ҳужумчиси Жоэл Кожо бўйича Эроннинг “Истиқлол” клубидан расмий таклиф тушди. Аммо Ўзбекистон Суперлигасида трансфер ойнасининг аллақачон ёпилгани, ҳозирда Жоэл Кожонинг ўрнини тўлдиришнинг имкони йўқлиги сабабли “Динамо” ПФК форс клубининг таклифини рад этди, — дейилади хабарда.
Бундан ташқари, клуб футболчининг ижтимоий тармоқларда эълон қилган фкрларини ички тартибда кўриб чиқиши ва тегишли чора кўришини маълум қилган.
Маълумот учун, келиб чиқиши ганалик бўлган Кожо “Динамо” сафида 17 учрашувда қатнашиб 11 бор рақиблар дарвозасини ишғол қилган.
Қирғизистон шарафини ҳимоя қилаётган футболчи терма жамоа сафида 15 учрашувда 7 бора гол уришга эришган. 10 октябрь кун Бишкекда ўтказилган Қирғизистон — Ўзбекистон учрашувида ҳам қирғизистонликларнинг биринчи голига 26 ёшли Жоэл муаллифлик қилган.
Самарқанд ва Кожо ўртасидаги шартнома муддати 2025 йилнинг сўнгигача амал қилади.
Изоҳ (0)