Samarqandning “Dinamo“ futbolchisi Joel Kojo Eronning “Istiqlol” klubiga o‘ta olmagani ortidan klub bosh murabbiyi va rahbariyatini keskin tanqid ostiga oldi.
2023-yildan beri “Dinamo” safida o‘ynayotgan qirg‘izistonlik futbolchiga Jaloliddin Masharipov harakat qilayotgan Eronning “Istiqlol“ klubi qiziqish bildirgan. Ma’lum bo‘lishicha, sportchi Eron klubiga rozilik bildirgan, Samarqand klubi ham avvaliga transferga qarshilik qilmagan. Ammo Eronda transferlar oynasi yopilishiga bir kun qolganida Eron klubi O‘zbekiston klubiga bog‘lana olmagan. Oqibatda transfer amalga oshmagan.
“Alloh ularning menga qilgan ishini hech qachon kechirmaydi. Men futboldan umidimni uzdim, yigitlar, futbol o‘ynashga kayfiyatim yo'q”, deya Kojo so‘zlarini keltiradi Sports nashri.
Futbolchining rafiqasi ma’lum qilishicha, mavsum boshida Abramov 100 ming AQSH dollari to‘lagan istalgan jamoaga qo‘yib yuborishni vaʼda qilgan. Eron klubi esa 300 ming AQSH dollari taklif qilgani ma’lum bo‘ldi.
O‘z navbatida Samarqand klubi matbuot xizmati vaziyatga izoh berdi.
“Dinamo” PFK shuni maʼlum qiladiki, darhaqiqat Erondagi transfer oynasining so‘nggi kunida jamoamiz hujumchisi Joel Kojo bo‘yicha Eronning “Istiqlol” klubidan rasmiy taklif tushdi. Ammo O‘zbekiston Superligasida transfer oynasining allaqachon yopilgani, hozirda Joel Kojoning o‘rnini to‘ldirishning imkoni yo‘qligi sababli “Dinamo” PFK fors klubining taklifini rad etdi, — deyiladi xabarda.
Bundan tashqari, klub futbolchining ijtimoiy tarmoqlarda e’lon qilgan fkrlarini ichki tartibda ko‘rib chiqishi va tegishli chora ko‘rishini ma’lum qilgan.
Ma’lumot uchun, kelib chiqishi ganalik bo‘lgan Kojo “Dinamo” safida 17 uchrashuvda qatnashib 11 bor raqiblar darvozasini ishg‘ol qilgan.
Qirg‘iziston sharafini himoya qilayotgan futbolchi terma jamoa safida 15 uchrashuvda 7 bora gol urishga erishgan. 10-oktyabr kun Bishkekda o‘tkazilgan Qirg‘iziston — O‘zbekiston uchrashuvida ham qirg‘izistonliklarning birinchi goliga 26 yoshli Joel mualliflik qilgan.
Samarqand va Kojo o‘rtasidagi shartnoma muddati 2025-yilning so‘ngigacha amal qiladi.
Izoh (0)