АҚШнинг Афғонистонга ажратган пуллари “Толибон” қўлига ўтган бўлиши мумкин — ҳисобот

Афғонистондаги хайрия гуруҳларига юборилган 293 миллион доллар маблағдан “Толибон” ёки бошқа жангари гуруҳлар фойдаланган бўлиши мумкин. Бу ҳақда АҚШ давлат департаментига таяниб, Dawn хабар берди.

Департаментнинг икки бюроси Афғонистондаги хайрия ташкилотларини текшириш бўйича ички қоидаларга риоя этганликларини исботлай олмаган. 

Давлат бу ёрдамдан аслида ким наф кўраётганини билиши муҳим, бу ёрдам “Толибон” ёки бошқа санкцияланган томонларга йўналтирилишига йўл қўймаслиги лозим, дейилади Афғонистонни қайта тиклаш бўйича махсус бош инспектор (SIGAR) ҳисоботида.

“Толибон” АҚШ ажратган пулларни “бир қанча воситалар, жумладан, гуманитар ташкилотларни ташкил этиш орқали” олишга уринган ва департамент “ҳамкорлари томонидан юзага келадиган хавф-хатарларни тўлиқ ва изчил баҳолаш” зарурлигини таъкидлаган.

SIGAR’нинг таъкидлашича, давлат департаментининг бешта бюросидан учтаси ёрдам жамғармаси олувчиларни текширишни талаб қиладиган департамент қоидаларига риоя қилган. Аммо Демократия, Инсон ҳуқуқлари ва меҳнат бюроси ҳамда Халқаро наркотикларга қарши кураш ва ҳуқуқни муҳофаза қилиш ишлари бюроси ўзларининг содиқлигини исботловчи етарли ҳужжатларни тақдим эта олмаган.

Шу тариқа, давлат департаменти Афғонистонга ажратилган камида 293 миллион доллар маблағ қай мақсадда фойдаланилганини исботлай олмаган.

Шу сабабдан маблағлардан “Толибон” ва терроризмга алоқадор шахслар, ташкилотларнинг ноқонуний фойда олиши хавфи юқори, дейилади ҳисоботда.