АҚШ давлат департаментининг уч нафар аъзоси “Толибон” қўлида асирликда қолмоқда. Бу ҳақда Афғонистон маҳаллий нашрлари тарқатган хабарларга асосланиб, Тhe Frontier Post хабар берди.
Манбада айтилишича, департамент вакиллари, АҚШ фуқаролари Жорж Глезманн, Маҳмуд Ҳабиби ва Райан Корбеттлар “Толибон” томонидан қамоқда сақланмоқда. АҚШ томони уларни озод қилиш бўйича Афғонистонга бир неча бор талаб жўнатган. Бироқ Кобулдаги ҳукумат талабни узлуксиз рад этиб келган.
Афғонистонлик сиёсий таҳлилчи Сайид Акбар Сиал Вардак департамент вакиллари ҳибсга олиниши сиёсий сабабларга эга эканлигини айтган. АҚШ вакиллари турист сифатида мамлакатга кириб келган. “Толибон” эса уларни жосус сифатида айблаб ҳибсга олган. Агарда терговчилар департамент вакиллари жосуслик фаолияти билан шуғуллангани ва маълумот тўплагани ҳақида ҳеч қандай далил топа олмаса, маҳбуслар озод қилиниши айтилган.
“Бу шахслар Афғонистонга аввало нима учун келганларини аниқлаш керак: жосуслик учунми, турист сифатидами ёки маданий объектларни зиёрат қилиш учунми? Агар уларнинг мақсади саёҳат қилиш бўлса, қонун бўйича қамалиши мумкин эмас. Аммо агар улар ғаразли ниятда келган бўлса ва жосуслик фаолияти билан шуғулланган бўлса, қамоққа олиниб, қонун бўйича жазоланиши шарт”, деган сиёсий таҳлилчи Сайид Акбар Сиал Вардак.
“Толибон” томони берган расмий баёнотда департаментнинг фақат бир вакили жосусликда айбланаётгани, қолган икки шахс қонунбузарлик содир этгани учун ҳибсга ташлангани таъкидланади. “Толибон” ҳукумати матбуот котиби Ҳамидуллоҳ Фитратнинг қўшимча қилишича, маҳбуслар ҳибсга олиниши юзасидан АҚШ вакиллари билан музокаралар олиб борилган. Аммо ҳозирча бир ечимга келинмаган.
Афғонистон сиёсий арбобларидан Самиуллоҳ Аҳмадзай “Толибон” ва АҚШ ўртасида муносабатларни яхшилаш учун Давлат департаменти вакилларини озод қилишга чақирган. Бу билан ўртадаги дипломатик тўсиқларни олиб ташлаш ва муаммоларни ҳал қилиш мумкинлиги уқтирилган.
“Агар бу маҳбуслар топширилса ва бунга икки томон ҳам рози бўлса, бу воқеа дипломатик муносабатларда тараққиётга олиб келади. АҚШ ва Ислом Амирлиги ўртасида ноқулай муносабат муҳити йўқолади”, деган Самиуллоҳ Аҳмадзай.
АҚШ расмийлари “Толибон”га мурожаат қилиб, ҳибсга олинган шахсларнинг тергов ҳужжатларини сўраган. Департамент вакиллари ваколатига кирмайдиган, АҚШ миллий манфаатларига дахл қиладиган мавзуларда уларни сўроқ қилмаслик талаб қилинган.
Изоҳ (0)