Сречко Катанес: “Мақсадимиз — ғалаба қозониш”

Ўзбекистон миллий жамоаси бош мураббийи Сречко Катанес ҳамда терма жамоа сардори Элдор Шомуродов эртанги ўйин олдидан матбуот анжуманида иштирок этди.

Бош мураббий Сречко Катанес эртанги ўйин ҳақида фикр билдирди.

— “Барчаси жойида, футболчиларимиз ўйинга тайёр. Кечаги машғулотда ҳам жамоамиз диққат ва эътибор билан ўйинга тайёргарлик кўрди. Биз ўз уйимизда ўйнаймиз, шу сабабли мақсадимиз — фақат ғалаба қозониш.

Тақвим ва жамоанинг ҳолати ҳақида

— Рақибимиз биз билан ўйинга қадар ўртоқлик ўйинлари ўтказа олди, кўпроқ машғулотда қатнашди. Биз эса яқинда йиғилдик, бироқ бу нарса биз учун янгилик эмас. 3 йилдан буён жамоа билан биргамиз ва бу борада етарлича кўникмага эгамиз. Ҳамма футболчилар йиғинга бир хил ҳолатда етиб келмади, кимдир кўпроқ ўйнади, кимдадир вазият бошқача. Лекин менинг вазифам барчасини таҳлил қилиш ва ўйинга тайёрлаш ҳисобланади.

Ҳаммаси жойида, биз шу руҳда давом этишимиз керак. Бу босқичда барча жамоалар кучли ҳисобланади, хусусан, эртанги рақибимиз ҳам.

Яқин йиллардаги таркибдаги ўзгаришлар ҳақида

— Мен эртага нима бўлишини билмайман, олдимизда катта йўл бор. Асосий эътиборимиз эртанги ўйинга қаратилган.

КХДРга қарши ўйиндаги таркиб ҳақида

— Эртанги таркиб ҳақида ҳеч нарса деёлмайман. Барчамиз эртага гувоҳ бўламиз.

Рақиб ҳақида

— Ушбу терма жамоани таҳлил қилиш қийин. Сурия ва Япония билан ўйинларда ҳар хил таркиб билан ҳаракат қилган. Жамоа тартибли, ўз услубига эга. Лекин биз ўз ўйинимизга эътибор қаратганмиз ва эртанги ўйинда ҳам нималарга қодирлигимизни майдонда исботлашимиз керак”, дея Катанес сўзларини келтиради “Дарё” мухбири.

Жамоа сардори Элдор Шомуродов ҳам журналистлар саволларига жавоб берди.

— “Ва ниҳоят узоқ кутилган йиллардан сўнг биз учун яна асосий босқич бошланади. Барчамиз ўйинга тайёрмиз. Мақсадимиз йўлида бор кучимиз билан ҳаракат қиламиз.

Аввалги цикллар ҳақида

— Аввалги цикллар давомида ёш футболчи сифатида қатнашганмиз ва тажрибали футболчилар билан бирга ҳаракат қилганмиз. Бироқ бу гал энди масъулият ўзимизда, ўрганган тажрибаларимизни ишга солишимиз керак. Бизда тайёргарлик учун етарлича вақт бўлди. Хатолар устида ишлаб бордик. Барчамиз бир оила бўлиб, биргаликда асосий вазифани бажаришга ишонамиз.

Илк чақирувимдан то ҳозирги кунга қадар ҳар доим энг юқори хоҳиш билан ҳаракат қилганман. Барчамиз Жаҳон чемпионатига чиқишни орзу қиламиз. Шу сабабли ҳар бир ўйинда фақат битта мақсад билан ҳаракат қиламиз. Бу йўлда барча имкониятимизни ишга соламиз”, деди Элдор Шомуродов.

Маълумот учун, Ўзбекистон терма жамоаси ЖЧ-2026 саралаш баҳсларини КХДРга қарши учрашув билан бошлайди. Учрашув эртага, 5 сентябрь куни “Бунёдкор” стадионида бўлиб ўтади.