O‘zbekiston milliy jamoasi bosh murabbiyi Srechko Katanes hamda terma jamoa sardori Eldor Shomurodov ertangi o‘yin oldidan matbuot anjumanida ishtirok etdi.
Bosh murabbiy Srechko Katanes ertangi o‘yin haqida fikr bildirdi.
— “Barchasi joyida, futbolchilarimiz o‘yinga tayyor. Kechagi mashg‘ulotda ham jamoamiz diqqat va eʼtibor bilan o‘yinga tayyorgarlik ko‘rdi. Biz o‘z uyimizda o‘ynaymiz, shu sababli maqsadimiz — faqat g‘alaba qozonish.
Taqvim va jamoaning holati haqida
— Raqibimiz biz bilan o‘yinga qadar o‘rtoqlik o‘yinlari o‘tkaza oldi, ko‘proq mashg‘ulotda qatnashdi. Biz esa yaqinda yig‘ildik, biroq bu narsa biz uchun yangilik emas. 3 yildan buyon jamoa bilan birgamiz va bu borada yetarlicha ko‘nikmaga egamiz. Hamma futbolchilar yig‘inga bir xil holatda yetib kelmadi, kimdir ko‘proq o‘ynadi, kimdadir vaziyat boshqacha. Lekin mening vazifam barchasini tahlil qilish va o'yinga tayyorlash hisoblanadi.
Hammasi joyida, biz shu ruhda davom etishimiz kerak. Bu bosqichda barcha jamoalar kuchli hisoblanadi, xususan, ertangi raqibimiz ham.
Yaqin yillardagi tarkibdagi o‘zgarishlar haqida
— Men ertaga nima bo‘lishini bilmayman, oldimizda katta yo‘l bor. Asosiy eʼtiborimiz ertangi o‘yinga qaratilgan.
KXDRga qarshi o‘yindagi tarkib haqida
— Ertangi tarkib haqida hech narsa deyolmayman. Barchamiz ertaga guvoh bo‘lamiz.
Raqib haqida
— Ushbu terma jamoani tahlil qilish qiyin. Suriya va Yaponiya bilan o‘yinlarda har xil tarkib bilan harakat qilgan. Jamoa tartibli, o‘z uslubiga ega. Lekin biz o‘z o‘yinimizga eʼtibor qaratganmiz va ertangi o‘yinda ham nimalarga qodirligimizni maydonda isbotlashimiz kerak”, deya Katanes so‘zlarini keltiradi “Daryo” muxbiri.
Jamoa sardori Eldor Shomurodov ham jurnalistlar savollariga javob berdi.
-tShDyID7.jpg)
— “Va nihoyat uzoq kutilgan yillardan so‘ng biz uchun yana asosiy bosqich boshlanadi. Barchamiz o‘yinga tayyormiz. Maqsadimiz yo‘lida bor kuchimiz bilan harakat qilamiz.
Avvalgi sikllar haqida
— Avvalgi sikllar davomida yosh futbolchi sifatida qatnashganmiz va tajribali futbolchilar bilan birga harakat qilganmiz. Biroq bu gal endi masʼuliyat o‘zimizda, o‘rgangan tajribalarimizni ishga solishimiz kerak. Bizda tayyorgarlik uchun yetarlicha vaqt bo‘ldi. Xatolar ustida ishlab bordik. Barchamiz bir oila bo‘lib, birgalikda asosiy vazifani bajarishga ishonamiz.
Ilk chaqiruvimdan to hozirgi kunga qadar har doim eng yuqori xohish bilan harakat qilganman. Barchamiz Jahon chempionatiga chiqishni orzu qilamiz. Shu sababli har bir o‘yinda faqat bitta maqsad bilan harakat qilamiz. Bu yo‘lda barcha imkoniyatimizni ishga solamiz”, dedi Eldor Shomurodov.
Ma’lumot uchun, O‘zbekiston terma jamoasi JCH-2026 saralash bahslarini KXDRga qarshi uchrashuv bilan boshlaydi. Uchrashuv ertaga, 5-sentyabr kuni “Bunyodkor” stadionida bo‘lib o‘tadi.
Izoh (0)