Ўтган ҳафта Конго ҳукумати томонидан муваффақиятсиз давлат тўнтаришига уринишдан сўнг ҳибсга олинган уч АҚШ фуқароси ва бир Британия фуқароси ўлим жазосига ҳукм қилиниши мумкин, деб ёзади Тhе Times.
19 май куни Конго Демократик Республикаси қуролли кучлари давлат тўнтаришига уринишнинг олдини олди. Ўша куни эрта тонгда Кристиан Маланга бошчилигидаги бир гуруҳ исёнчилар Киншасадаги мамлакатнинг амалдаги президенти Феликс Чисекеди қароргоҳига бостириб киришга ҳаракат қилишди. Давлат тўнтаришига уриниш амалга ошмади, соқчилар билан отишмада олти киши ҳалок бўлди.
Шу билан бирга, давлат тўнтаришига уринишда тўрт нафар хориж фуқароси иштирок этгани маълум бўлди. Конго армияси матбуот котиби бригада генерали Силвен Экенге Тhe Times нашрига уларнинг сўроқ қилинаётганини айтди. Улар орасида америкалик Кристиан Маланга ҳам бор, унинг ўлими ҳақида аввалроқ ОАВ хабар берган эди.
Маланга қочишга уринганида қўлга олинди, деди Конго армияси вакили. Яна уч нафари: Тайлер Томпсон, Бенжамин Залман-Полун ва британиялик Эзанги Юсуф ҳибсда сақланмоқда.
“Сўроқ давом этмоқда. Шундан сўнг уларни оддий суд эмас, ҳарбий трибунал кўриб чиқади”, — деди бригада генерали.
Силвен Экенгенинг қўшимча қилишича, яқинда Конгода ўлим жазосига қўйилган мораторий бекор қилингани сабабли исёнчилар ҳам бу жазога дуч келиши мумкин.
“Ўлим жазоси жанговар ҳаракатлар контекстида ва исён қилиш мақсадида қурол олганларга қарши қўлланади”, — деди армия вакили.
Изоҳ (0)