Бирлашган Араб Амирликлари расмийлари йил охиригача мамлакатда иккинчи атом электр станциясини (АЭС) қуриш бўйича тендер эълон қилиш имкониятини кўриб чиқмоқда.
Бу ҳақда БААнинг МАГАТЭдаги доимий вакили Ҳамад ал-Каабига таяниб, Reuters агентлиги хабар берди.
“Ҳукумат бу вариантни кўриб чиқмоқда, ҳали тендер жараёни бўйича якуний қарор қабул қилингани йўқ, аммо шуни айтишим мумкинки, ҳукумат бу масалани фаол ўрганмоқда”, деди ал-Кааби.
Агентликнинг хабар беришича, мамлакатда иккинчи атом электр станциясини қуриш учун таклифлар, хусусан, Россия, Хитой ва АҚШ томонидан берилиши мумкин. Объектнинг қурилиши БАА ҳукуматига “ўнлаб миллиард долларга” тушиши кутилмоқда.
Ал-Каабининг сўзларига кўра, янги атом электр станцияси икки ёки тўртта реактордан иборат бўлади. Унинг қўшимча қилишича, мамлакатдаги ягона атом электр станциясининг сўнгги реактори йил охиригача тижорат фойдаланишга топширилади, шунинг учун БАА ҳукумати аллақачон қувватни ошириш истиқболларини ўрганишга киришган. Ал-Кааби, шунингдек, БАА вакиллари аллақачон дунёнинг етакчи компаниялари билан атом электр станцияларини қуриш бўйича музокаралар олиб борганини айтди.
Бирлашган Араб Амирликлари маъмурлари келгуси 10 йил ичида аҳоли сонининг кўпайиши ва саноат қувватининг ошиши ҳисобига мамлакатда электр энергияси истеъмоли сезиларли даражада ошишини башорат қилмоқда. Мамлакат уранни бойитиш билан шуғулланиш ниятида эмас, шунинг учун зарур ёқилғини халқаро бозордан сотиб олади.
Изоҳ (0)