Шавкат Мирзиёев ва Александр Лукашенко 30 август куни телефон орқали мулоқот қилди.
![](/static/2024/08/30/Lukashenko Mirziyoyev-o9Mir2Va.jpg)
Президент матбуот хизматининг хабар қилишича, суҳбат аввалида Шавкат Мирзиёев Беларусь президентини юбилей билан табриклади. Александр Лукашенко 30 август куни 70 ёшни қарши олганди. Президент унга мустаҳкам соғлик ва катта ютуқлар, дўст Беларусь халқига фаровонлик ва равнақ тилади.
Ўз навбатида, Беларусь президенти Ўзбекистон раҳбари ва кўп миллатли халқини яқинлашиб келаётган Мустақиллик куни билан самимий табриклаб, тинчлик, барқарор тараққиёт ва ривожланиш тилади.
Суҳбат давомида 7—9 февраль кунлари Беларусь президентининг Ўзбекистонга ташрифи чоғида эришилган келишувларни қабул қилинган "йўл харитаси"га мувофиқ амалга ошириш масалалари муҳокама қилинди. Беларусь Миллий Мажлиси Республика Кенгаши раиси Наталя Кочанова бошчилигидаги делегациянинг яқинда Ўзбекистонга қилган ташрифининг самарали натижалари юқори баҳоланди.
Саноат кооперацияси бўйича қўшма лойиҳаларни тайёрлаш ва амалга оширишни тезлаштириш, шунингдек, маданий-гуманитар алмашинувни кенгайтириш муҳимлиги таъкидланди.
Изоҳ (0)