“Tenet Group” қурилиш компанияси томонидан Тошкент шаҳрининг Истиқбол ва Содиқ Азимов кўчалари кесишмаси яқинида янги лойиҳа қурилиши режалаштирилган. Уни амалга оширмоқчи бўлган компания қурилиш бўладиган ҳудуддаги дарахтларни бошқа жойга кўчириб ўтиш йўли билан сақлаб қолишни мақсад қилган. Бунинг учун компания жамоатчилик фикрини ўрганди.
Мажмуа қуриладиган ҳудуднинг майдони 11 900 метр квадратни ташкил этади. Айни шу ҳудудда 9 та турдаги дарахтлар мавжуд бўлиб, булар: 7 туп ўрик, 9 туп терак, 3 туп ёнғоқ, 17 туп айлант, 2 туп олма ва 1 тупдан гилос, шафтоли, қарағай ҳамда шумтол баргли заранглардир. “Tenet Group” ушбу дарахтларни қурилиш ҳудудининг бошқа қисмига кўчириш ниятида. Компания бу масаласида “Max Processing” корхонаси билан ҳамкорлик қилаётганини маълум қилди.
“Max Processing” компанияси директори Бекали Исмоилов ушбу ҳудудда уч ой олдин “Tenet Group” томонидан қурилиш ишларига тайёргарлик ишлари бошлангани заҳоти, компания билан ҳамкорлик бошланганини ва ўша вақтдан буён дарахтлар парваришланиб келинаётганини таъкидлади. Унинг айтишича, қурилиш майдонида жой етарли бўлмаганлиги сабабли кам қийматли ёввойи дарахт тури бўлган 7 туп айлант ва 1 туп қарағай дарахти намлик етарли бўлган қулай жойга кўчириб ўтказилади.
“Биз сизларга кўчириш ишлари қандай амалга оширилишини кўрсатмоқчимиз. Бунда ҳар бир дарахт биз учун қадрли бўлиб, унинг яшовчанлигини аниқлаб, ҳаракатлантиришга тайёрлаймиз. Кўчириш жараёни масъулиятли вазифа бўлиб, ҳар бир деталга эътибор беришни талаб қилади. Биз кўчириш якунлангандан сўнг дарахтларни 95 фоиз яшаб кетишига кафолат берамиз ва доимий парваришлаймиз”, деди “Max Processing” раҳбари.
Бекали Исмоилов шу яқин келажакдаги энг салқин кечада кўчириш ишлари амалга оширилишини айтди. Шунингдек, дарахтлар қайта экишдан сўнг 3 йил давомида “Max Processing” назорати остида бўлиши ва мавсумий об-ҳавога қараб, уларнинг ҳолати мунтазам назорат қилиниши таъкидланди.
Эшитувда аҳоли томонидан ушбу дарахтларни қандай суғориш масаласида савол келиб тушганда масъуллар суғориш қудуқ қазиш орқали йўлга қўйилишини таъкидлашди. Ушбу гаплардан сўнг аҳоли фақатгина қурилиш ҳудудида эмас, унга туташ ҳудудларда ҳам неча йиллик дарахтлар борлиги ва улар қуриш арафасида эканлигини айтиб, ёрдам сўради. “Tenet Group” раҳбари Дониёр Алимов бу таклифни маъқуллаб, маҳалла раҳбарияти билан келишган ҳолда ушбу ҳудудларда яшиллик даражасини ошириш бўйича қўлидан келган ишни қилишини билдирди.
“Янги лойиҳани ишлаб чиқишда компания ходимлари экологик мувозанатни сақлаб қолиш учун эътибор қаратишган. Шу сабабдан ҳам лойиҳа доирасида биохилмахилликни таъминлаш ва экотизимни қўллаб-қувватлаш мақсадида қўшимча равишда туманимиз ҳудудида яна 100 туп дарахт экиш режалаштирилган. Албатта, бунда ҳудуднинг иқлим шароити ва тупроқ талабларига мос келадиган баргли ва игнабаргли дарахтлар танланади”, – деди “Tenet Group” раҳбари Дониёр Алимов эшитув сўнгида.
Шериклик ҳуқуқи асосида.
Изоҳ (0)