“Tenet Group” qurilish kompaniyasi tomonidan Toshkent shahrining Istiqbol va Sodiq Azimov ko‘chalari kesishmasi yaqinida yangi loyiha qurilishi rejalashtirilgan. Uni amalga oshirmoqchi bo‘lgan kompaniya qurilish bo‘ladigan hududdagi daraxtlarni boshqa joyga ko‘chirib o‘tish yo‘li bilan saqlab qolishni maqsad qilgan. Buning uchun kompaniya jamoatchilik fikrini o‘rgandi.
Majmua quriladigan hududning maydoni 11 900 metr kvadratni tashkil etadi. Ayni shu hududda 9 ta turdagi daraxtlar mavjud bo‘lib, bular: 7 tup o‘rik, 9 tup terak, 3 tup yong‘oq, 17 tup aylant, 2 tup olma va 1 tupdan gilos, shaftoli, qarag‘ay hamda shumtol bargli zaranglardir. “Tenet Group” ushbu daraxtlarni qurilish hududining boshqa qismiga ko‘chirish niyatida. Kompaniya bu masalasida “Max Processing” korxonasi bilan hamkorlik qilayotganini maʼlum qildi.
“Max Processing” kompaniyasi direktori Bekali Ismoilov ushbu hududda uch oy oldin “Tenet Group” tomonidan qurilish ishlariga tayyorgarlik ishlari boshlangani zahoti, kompaniya bilan hamkorlik boshlanganini va o‘sha vaqtdan buyon daraxtlar parvarishlanib kelinayotganini taʼkidladi. Uning aytishicha, qurilish maydonida joy yetarli bo‘lmaganligi sababli kam qiymatli yovvoyi daraxt turi bo‘lgan 7 tup aylant va 1 tup qarag‘ay daraxti namlik yetarli bo‘lgan qulay joyga ko‘chirib o‘tkaziladi.
“Biz sizlarga ko‘chirish ishlari qanday amalga oshirilishini ko‘rsatmoqchimiz. Bunda har bir daraxt biz uchun qadrli bo‘lib, uning yashovchanligini aniqlab, harakatlantirishga tayyorlaymiz. Ko‘chirish jarayoni mas’uliyatli vazifa bo‘lib, har bir detalga e’tibor berishni talab qiladi. Biz ko‘chirish yakunlangandan so‘ng daraxtlarni 95 foiz yashab ketishiga kafolat beramiz va doimiy parvarishlaymiz”, dedi “Max Processing” rahbari.
Bekali Ismoilov shu yaqin kelajakdagi eng salqin kechada ko‘chirish ishlari amalga oshirilishini aytdi. Shuningdek, daraxtlar qayta ekishdan so‘ng 3 yil davomida “Max Processing” nazorati ostida bo‘lishi va mavsumiy ob-havoga qarab, ularning holati muntazam nazorat qilinishi taʼkidlandi.
Eshituvda aholi tomonidan ushbu daraxtlarni qanday sug‘orish masalasida savol kelib tushganda mas’ullar sug‘orish quduq qazish orqali yo‘lga qo‘yilishini ta’kidlashdi. Ushbu gaplardan so‘ng aholi faqatgina qurilish hududida emas, unga tutash hududlarda ham necha yillik daraxtlar borligi va ular qurish arafasida ekanligini aytib, yordam so‘radi. “Tenet Group” rahbari Doniyor Alimov bu taklifni ma’qullab, mahalla rahbariyati bilan kelishgan holda ushbu hududlarda yashillik darajasini oshirish bo‘yicha qo‘lidan kelgan ishni qilishini bildirdi.
“Yangi loyihani ishlab chiqishda kompaniya xodimlari ekologik muvozanatni saqlab qolish uchun e’tibor qaratishgan. Shu sababdan ham loyiha doirasida bioxilmaxillikni ta’minlash va ekotizimni qo‘llab-quvvatlash maqsadida qo‘shimcha ravishda tumanimiz hududida yana 100 tup daraxt ekish rejalashtirilgan. Albatta, bunda hududning iqlim sharoiti va tuproq talablariga mos keladigan bargli va ignabargli daraxtlar tanlanadi”, – dedi “Tenet Group” rahbari Doniyor Alimov eshituv so‘ngida.
Sheriklik huquqi asosida.
Izoh (0)