“Толибон” ҳаракати вакиллари Афғонистоннинг марказий Ғазни вилоятидаги иккита хусусий мактабни ёпди. Бунга таълим даргоҳларида ишлайдиган ўқитувчиларнинг соқол олдириб юргани сабаб бўлган, деб хабар бермоқда Hasht-e Subh газетаси маҳаллий манбаларга таяниб.
Манбаларнинг айтишича, мактабларни ёпиш тўғрисидаги қарорнинг яна бир сабаби ўқитувчиларнинг ҳижоб ўраш меъёрларига риоя қилмагани ҳам бўлиши мумкин. Мактаблар 2-октябр куни Эзгуликни тарғиб қилиш ва иллатларга қарши кураш вазирлигининг маҳаллий ҳукумати қарори билан ёпилган.
Бундан ташқари, “Толибон” Ғазни шаҳридаги иккита болалар таълим марказини ёпган, чунки ушбу муассасаларда қизлар дарсга қатнашаётган эди. Шу билан бирга марказларда турли жинсдаги болалар учун таълим “Толибон” талабларига мувофиқ олиб борилган: улар алоҳида ўқитилган.
“Толибон” Ғазни вилоятидаги таълим марказларига қизларнинг киришини тақиқлагани ҳақида 21 июнь куни маълум бўлганди. Ушбу янги қоидага риоя қилмаган тақдирда таълим муассасалари раҳбариятига жазо қўллаш билан таҳдид қилинган.
Эслатиб ўтамиз, 2021 йил августида ҳокимиятга келганидан сўнг, “Толибон” 12 ёшдан ошган қизларнинг мактабга боришини тақиқлади. 2022 йил декабрь ойида афғон университетларида қизлар учун дарслар тўхтатилди, кейинроқ университетларда аёллар, жумладан профессор-ўқитувчиларнинг ҳам ишлаши тақиқланди. Умуман олганда, “Толибон” изчил равишда қизларнинг таълимини чеклаш сиёсатини олиб бормоқда, ўғил болаларга эса имкон қадар диний таълим беришга уринмоқда.
Изоҳ (0)