Конгода маймунчечак сабабли маймун гўштини истеъмол қилиш тақиқланди

Конгода маймун гўштини истеъмол қилиш кенг тарқалган маймунчечак эпидемияси туфайли тақиқланди.

Африкада ушбу касалликнинг 17 мингдан ортиқ ҳолатлари аллақачон қайд этилган. Тахминан 15 мингта ҳолатлар Африканинг аҳоли энг зич жойлашган давлатларидан бири бўлган Конго Демократик Республикасида (КДР) қайд этилган.

Мамлакат соғлиқни сақлаш вазири Самуэл Рожер Камба аҳолини профилактика чораларига риоя қилишга, қўлларини мунтазам равишда совун билан ювишга, агар йўқ бўлса, кул билан артишга чақирган, дейилади хабарда.

Республикада ёввойи маймунлар билан алоқа қилиш ва уларнинг гўштини истеъмол қилиш тақиқланган. Расмийлар бошқа ёввойи ҳайвонлар ва кемирувчилар ҳам инфекция манбаи бўлиши мумкинлиги ҳақида огоҳлантирган. Эпидемияга қарши курашиш учун Конго ҳукумати 10 миллион долларгача маблағ ажратган ҳамда 3,5 миллион доза вакцинага эҳтиёж борлигини эълон қилган.

Мазкур вакциналарнинг қиймати 600 миллион долларга баҳоланган. Ўтган йил давомида Конгода 500 га яқин одам Mpoxдан вафот этган.

Москвадаги Конго диаспораси Россия ҳукуматига инсонпарварлик ёрдами сўраб мурожаат қилган. Улар, шунингдек, миллионлаб одамларнинг ҳаёти хавф остида эканлигини таъкидлаб, зарар кўрган ҳудудларни ҳимоя қилиш учун вакциналар билан таъминлашга чақирган.