Волгоград вилоятининг Суровикино шаҳридаги 19-сонли ахлоқ тузатиш колониясида маҳбуслар бир неча кишини гаровга олди. Бу ҳақда Федерал жазони ижро этиш хизматининг вилоят бўйича матбуот хизмати хабар берди.
Идора маълумотларига кўра, бу интизом комиссияси йиғилишида содир бўлган ва ахлоқ тузатиш муассасаси ходимлари гаровга олинган.
Ҳозирда гаровга олинганларни озод қилиш чоралари кўрилмоқда. Жабрланганлар бор, дейилади хабарда.
“ТАСС” хабарига кўра, Федерал жазони ижро этиш хизмати ходимларидан бири ҳалок бўлган, ҳужумчиларнинг минимал сони уч нафарни ташкил қилган. База нашрининг ёзишича, жами тўрт киши гаровга олинган, улардан баъзилари ўлдирилган бўлиши мумкин. Шунингдек, телеграм-канал маълумотларига кўра, ҳужумчилар ИШИДга алоқадор эканлигини даъво қилмоқда.
Ҳужумчилар Грузия ҳудудига олиб бориши керак бўлган вертолёт ва 2 миллион доллар талаб қилган.
Гаровга олиш натижасида яраланганлар орасида АТК-19 бошлиғи ҳам бўлган, дея қайд этади База.
16 июнь куни олти нафар маҳбус Ростов тергов изоляторининг икки ходимини - тергов изоляторининг навбатчилик смена инспектори Виктор Кончаков ва минтақавий федерал жазони ижро этиш хизмати тезкор бошқармаси бошлиғи Александр Богмани гаровга олган эди.
Ҳужумнинг уч иштирокчиси Черкесскда террорчилик ташкилотида иштирок этиш ва теракт тайёрлашда айбланиб, қаттиқ тартибли колонияда жазони ўтаган. Босқинчилар ўзларини ИШИДга мансуб эканликларини эълон қилиб, “биродарлари қамоққа олинган Ростов марказий қамоқхонасини” қўлга олганликларини маълум қилишган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)