Украина президенти Владимир Зеленский уруш бошланганидан сўнг кўчиб кетган украиналик эркакларни қайтаришда Ғарб етакчиларидан ёрдам сўради. Бу ҳақда Bloomberg хабар берди.
Маълумотларга кўра, Зеленский бу масалани икки томонлама учрашувлар доирасида иттифоқчилар билан муҳокама қилган. Бироқ “Польшадан Венгриягача” бўлган давлатларнинг сиёсатчилари уруш давом этар экан, украиналик қочқинларни ватанига мажбуран қайтармасликларини билдирган.
“Украиналик қочқинларни қабул қилаётган мамлакатлар янги ишчилардан иқтисодий фойда олмоқда”, деб таъкидлайди Bloomberg.
Ушбу давлатлардаги кўплаб компанияларда, масалан, яқинда қурилган автомобиль ёки аккумулятор ишлаб чиқариш заводлари учун ходимлар етишмайди.
- БМТнинг Қочоқлар бўйича олий комиссари бошқармаси маълумотларига кўра, Россиянинг кенг кўламли босқини бошланганидан бери 17 миллионга яқин украиналик — урушдан олдинги аҳолининг учдан бир қисмидан кўпроғи ўз уйларини тарк этган. Олти миллиондан ортиқ Украина фуқароси хорижда қочоқ бўлиб қолмоқда.
Хусусан, урушдан олдин ҳам украиналиклар истиқомат қилган Польша Украинадан 950 мингдан зиёд қочқинларни қабул қилди. Бунда уларнинг 2023 йилда мамлакат ялпи ички маҳсулотига қўшган ҳиссаси 0,7-1,1% атрофида баҳоланмоқда.
Бундан ташқари, Польшадаги украиналик қочқинлар асосан ўзларини ўзлари таъминлайди: даромадларининг 80 фоизи мамлакатда топган ишларидан келади. Чехияда эса украиналик қочқинлар 2024 йилнинг биринчи чорагида ижтимоий ёрдам сифатида олган маблағларидан деярли икки баробар кўп солиқ тўлаган.
Тўғрисини айтганда, кўплаб Чехия компаниялари украиналик қочқинларнинг малакаси ва меҳнатига таянади. Мисол учун, қурилиш соҳаси украиналик ишчилар бўлмаса бутунлай тўхтаб қолган бўларди, дея изоҳ берди Чехия чакана савдо ва меҳмондўстлик саноатининг бош лобби гуруҳи раҳбари Томаш Проуса.
Изоҳ (0)