Сурхондарё вилояти Сариосиё туманида аёл танишига берган қарзини МИБ орқали қайтариб олди. Бу ҳақда МИБ ахборот хизмати “Дарё”га хабар берди.
Маълум қилинишича, Сариосиё туманида яшовчи тадбиркор аёл ўзининг яқин таниши бўлган С.А.нинг илтимосини рад этмай, қисқа фурсатда қайтариш шарти билан 100 миллион сўмга яқин қарз берган. Ваъда қилинган кун ўтган бўлса-да, қарзни бермаслик учун турли баҳоналарни рўкач қилиб, қарзни қайтармай келган.
Аёл икки йил ўтиб, фуқаролик ишлари бўйича Сариосиё туман судига мурожаат қилди. Суд унинг ҳақиқатдан унинг танишига 97 миллион 560 минг сўм қарз берганини, ушбу қарзлар йиллар давомида қайтарилмагани сабабли мажбурий тартибда ундиришни белгилаб берди.
Мазкур суднинг қарз ундириш тўғрисидаги ижро ҳужжати бюронинг Сариосиё туман бўлими иш юритувига қабул қилиниб, ижро ҳаракатларига киришилди. Қарздор фуқаро С.А. бир неча бор огоҳлантирилган бўлса-да, қарздорликни белгиланган ихтиёрий муддатда қайтармаган.
Шундан сўнг, мажбурий ижро ҳаракатларига киришилиб, қарздор фуқарога тегишли бўлган кўчмас мулки хатловга олинди ва реализация қилиш мақсадида аукцион савдоларига чиқарилган вақтда белгиланган қарздорлик ҳамда олдиндан тўланган давлат божи жами 101 миллион 480 минг сўм нақд ундириб берилиши таъминланди.
Ижро ҳужжати амалда тамомланиб, қарздорга нисбатан қўлланган барча чеклов чоралари бекор қилинди.
Изоҳ (0)