Ижтимоий тармоқларда 9 август куни Олмазор туманида айрим фуқароларнинг МИБ ходимига пичоқ билан таҳдид қилганлиги ҳақидаги хабарлар тарқалди. Ҳолат юзасидан МИБ матбуот хизмати “Дарё”га маълумот берди.
Ўрганиш ишларида маълум бўлишича, видеодаги ҳолат 6 август куни Олмазор тумани “Шодиёна” МФЙ, Мухбир кўчасида содир бўлган.
18 июль куни бюронинг давлат ижрочилари суд қарорига мувофиқ фуқаролар М.Б., С.И., ва И.М.ларни хонадондан бошқа турар жой бермаган ҳолда мажбурий тартибда кўчириш бўйича мажбурий ижро ҳаракатларини олиб борган ҳамда ундирувчи томонлар хонадонга киритилган.
Қарздорлар ўзларига тегишли мол-мулкларни олиб кетмаганлиги сабабли хонадон ичидаги мол-мулк вақтинча сақлаш учун ундирувчининг вакилига тилхат асосида топширилган.
Шундан сўнг 6 август куни маҳалла раиси, ИИБ профилактика инспектори ва тарафлар иштирокида мол-мулкларни қарздорларга олиб бериш жараёнида, қарздор С.И ва ундирувчининг вакили Н.Е. ўртасида жанжал келиб чиққан. С.И. канцелярия пичоғи билан Н.Е.га ташланган вақтида профилактика инспектори, давлат ижрочиси ва маҳалла фаоллари уларни ажратган.
Ушбу ҳолатда бирор-бир шахсларга тан жароҳати етказилмаган ва туман ИИБ ходимлари томонидан тегишли ҳужжатлар расмийлаштирилган.
“Ижтимоий тармоқларда чиқарилган видеотасвирда “МИБ ходимига пичоқ билан ташланди” сарлавҳали хабарлар асосга эга эмас”, дейилади хабарда.
Изоҳ (0)