Бугун, 7 август куни Жаҳон иқтисодиёти ва дипломатия университети (ЖИДУ)да “Ўзбекистонда олий таълим трансформацияси: Япония билан ҳамкорликда инновация ва глобал мукаммаллик сари” мавзусида халқаро илмий-амалий семинар бўлиб ўтди.
Тадбир ЖИДУ ҳузуридаги Истиқболли халқаро тадқиқотлар институти (IXТИ) томонидан ҳамда Nippon Foundation жамғармаси (Япония) ҳамкорлигида амалга оширилган кенг кўламли лойиҳанинг якуний қисми сифатида ташкил этилди.
Лойиҳа доирасида Ўзбекистон олий таълим тизимининг бугунги ҳолати, муаммолари ва истиқболларини ўрганиш, соҳадаги кейинги ислоҳотлар жараёнига олимлар ва мутахассисларни жалб этиш, Марказий Осиё ва Япония ўртасидаги илмий-маърифий алоқаларни мустаҳкамлаш, шунингдек, олий таълим муассасалари тармоғини ривожлантиришга қаратилган комплекс тадқиқот олиб борилган.
Жаҳон иқтисодиёти ва дипломатияси университети биринчи проректори Акром Умаров лойиҳанинг иккинчи босқичида олий таълим муассасаларидаги муаммо ва камчиликларни бартараф этиш учун Япониянинг Nippon Foundation жамғармаси маблағ ажратишни режа қилаётганини таъкидлади.
“Лойиҳанинг асосий мақсади — Ўзбекистондаги олий таълим соҳасига баҳо бериш ва маълум муаммоларни аниқлаш. Буни аниқлаш учун 5 та ҳудудда тадқиқот ўтказилди. 1300 га яқин инсонлардан сўровнома олинган. 50 дан зиёд олим ва тадқиқотчи билан суҳбат ўтказилди. Шу асосда илмий маъруза тайёрланди. Бунда, биринчидан, соҳадаги камчиликларни аниқлаш бўлса, иккинчидан, бу муаммоларни ечишда халқаро ҳамкор давлатлар билан биргаликда ҳаракат қилиш бўлади. Айни шу соҳада Японияга кўпроқ эътибор қаратилган.
Nippon Foundation айни шу тадқиқот асосида ўзи учун режалар ишлаб чиқади. Ҳозир биз уларга IT, инженерия ва биотехнология соҳаларида маълум камчиликлар борлигини маълум қилдик. Энди жамғарма кейинги босқичда шу йўналишдаги мутахассислар билан таълим имкониятларини кенгайтириш масаласини кўриб чиқади. Яъни кейинги йилдан бошлаб Nippon Foundation жамғармаси олий таълимдаги камчиликларни қоплаш учун маблағ ажратмоқчи. Лекин ҳозирча бу молиявий маблағнинг миқдори аниқ эмас. Бироқ уларнинг молиявий имкониятлари жуда катта”, дейди Акром Умаров.
Шу билан бирга, Акром Умаров Япония Марказий Осиё мамлакатлари, хусусан, Ўзбекистонга эътибор қаратиб, юмшоқ кучга урғу бераётганини қўшимча қилди.
“Яқин кунларда Япония бош вазири Ўзбекистонга ташриф билан келмоқда. Яъни Япониянинг Марказий Осиё минтақасига, хусусан, Ўзбекистонга қизиқиши анча ортган. Япониянинг мақсади — бу минтақада ўзининг имкониятлари ва иқтисодий манфаатларини кучайтириш. Nippon Foundation жамғармаси шу йўналишда Япония ҳукуматининг олдинга қўяётган устувор мақсадларини кузатиб боради.
Япониянинг юмшоқ кучи — асосан, таълим. Япониянинг бу борада устун жиҳатлари бор. Улар ҳозир инсон капитали, таълим ва иновацион технологияларга кўпроқ урғу бермоқчи. Шу орқали ўзининг ҳамкорлигини Марказий Осиё мамлакатлари, хусусан, Ўзбекистон билан кучайтирмоқчи”, деди у.
Шунингдек, Умаров тадқиқот жараёнида Ўзбекистон олий таълим соҳасида аниқланган муаммо ва камчиликларни санаб ўтди.
“Ҳозир Ўзбекистондаги барча университетлар халқаро институтлар тармоқларига тўлиқ уланмаган. Баъзи олий таълим муассасаларимизда чет тилини билиш даражаси унча юқори эмас. Мисол учун, айрим университетлар халқаро ҳамкорлар томонидан таклиф қилинаётган илмий тадқиқотларни хориждан молиялаштириш жараёнларида тўлақонли иштирок этмаяпти. Бундан ташқари, техник жиҳозлаш масаласи ҳали халқаро даражаларга тўлиқ жавоб бермайди. Шунингдек, кўплаб олий таълим муассасаларида замонавий маркетинг дастури мавжуд эмас. Чунки Ўзбекистонда катта бозор мавжуд. Ҳамма ҳам буни тўлиқ тушуниб етмаяпти”, деди Акром Умаров.
Маълумот учун, Ўзбекистон президенти 9 август куни Остона шаҳрида бўлиб ўтадиган Марказий Осиё давлатлари раҳбарларининг навбатдаги Маслаҳат учрашуви ва “Марказий Осиё + Япония” мулоқотининг биринчи саммитида ҳам иштирок этади.
Изоҳ (0)