Bugun, 7-avgust kuni Jahon iqtisodiyoti va diplomatiya universiteti (JIDU)da “O‘zbekistonda oliy ta’lim transformatsiyasi: Yaponiya bilan hamkorlikda innovatsiya va global mukammallik sari” mavzusida xalqaro ilmiy-amaliy seminar bo‘lib o‘tdi.
Tadbir JIDU huzuridagi Istiqbolli xalqaro tadqiqotlar instituti (IXTI) tomonidan hamda Nippon Foundation jamg‘armasi (Yaponiya) hamkorligida amalga oshirilgan keng ko‘lamli loyihaning yakuniy qismi sifatida tashkil etildi.
Loyiha doirasida O‘zbekiston oliy taʼlim tizimining bugungi holati, muammolari va istiqbollarini o‘rganish, sohadagi keyingi islohotlar jarayoniga olimlar va mutaxassislarni jalb etish, Markaziy Osiyo va Yaponiya o‘rtasidagi ilmiy-maʼrifiy aloqalarni mustahkamlash, shuningdek, oliy taʼlim muassasalari tarmog‘ini rivojlantirishga qaratilgan kompleks tadqiqot olib borilgan.
Jahon iqtisodiyoti va diplomatiyasi universiteti birinchi prorektori Akrom Umarov loyihaning ikkinchi bosqichida oliy ta’lim muassasalaridagi muammo va kamchiliklarni bartaraf etish uchun Yaponiyaning Nippon Foundation jamg‘armasi mablag‘ ajratishni reja qilayotganini ta’kidladi.
“Loyihaning asosiy maqsadi — O‘zbekistondagi oliy ta’lim sohasiga baho berish va ma’lum muammolarni aniqlash. Buni aniqlash uchun 5 ta hududda tadqiqot o‘tkazildi. 1300 ga yaqin insonlardan so‘rovnoma olingan. 50 dan ziyod olim va tadqiqotchi bilan suhbat o‘tkazildi. Shu asosda ilmiy ma’ruza tayyorlandi. Bunda, birinchidan, sohadagi kamchiliklarni aniqlash bo‘lsa, ikkinchidan, bu muammolarni yechishda xalqaro hamkor davlatlar bilan birgalikda harakat qilish bo‘ladi. Ayni shu sohada Yaponiyaga ko‘proq e’tibor qaratilgan.
Nippon Foundation ayni shu tadqiqot asosida o‘zi uchun rejalar ishlab chiqadi. Hozir biz ularga IT, injeneriya va biotexnologiya sohalarida ma’lum kamchiliklar borligini ma’lum qildik. Endi jamg‘arma keyingi bosqichda shu yo‘nalishdagi mutaxassislar bilan ta’lim imkoniyatlarini kengaytirish masalasini ko‘rib chiqadi. Ya’ni keyingi yildan boshlab Nippon Foundation jamg‘armasi oliy ta’limdagi kamchiliklarni qoplash uchun mablag‘ ajratmoqchi. Lekin hozircha bu moliyaviy mablag‘ning miqdori aniq emas. Biroq ularning moliyaviy imkoniyatlari juda katta”, deydi Akrom Umarov.
Shu bilan birga, Akrom Umarov Yaponiya Markaziy Osiyo mamlakatlari, xususan, O‘zbekistonga e’tibor qaratib, yumshoq kuchga urg‘u berayotganini qo‘shimcha qildi.
“Yaqin kunlarda Yaponiya bosh vaziri O‘zbekistonga tashrif bilan kelmoqda. Ya’ni Yaponiyaning Markaziy Osiyo mintaqasiga, xususan, O‘zbekistonga qiziqishi ancha ortgan. Yaponiyaning maqsadi — bu mintaqada o‘zining imkoniyatlari va iqtisodiy manfaatlarini kuchaytirish. Nippon Foundation jamg‘armasi shu yo‘nalishda Yaponiya hukumatining oldinga qo‘yayotgan ustuvor maqsadlarini kuzatib boradi.
Yaponiyaning yumshoq kuchi — asosan, ta’lim. Yaponiyaning bu borada ustun jihatlari bor. Ular hozir inson kapitali, ta’lim va inovatsion texnologiyalarga ko‘proq urg‘u bermoqchi. Shu orqali o‘zining hamkorligini Markaziy Osiyo mamlakatlari, xususan, O‘zbekiston bilan kuchaytirmoqchi”, dedi u.
Shuningdek, Umarov tadqiqot jarayonida O‘zbekiston oliy ta’lim sohasida aniqlangan muammo va kamchiliklarni sanab o‘tdi.
“Hozir O‘zbekistondagi barcha universitetlar xalqaro institutlar tarmoqlariga to‘liq ulanmagan. Ba’zi oliy ta’lim muassasalarimizda chet tilini bilish darajasi uncha yuqori emas. Misol uchun, ayrim universitetlar xalqaro hamkorlar tomonidan taklif qilinayotgan ilmiy tadqiqotlarni xorijdan moliyalashtirish jarayonlarida to‘laqonli ishtirok etmayapti. Bundan tashqari, texnik jihozlash masalasi hali xalqaro darajalarga to‘liq javob bermaydi. Shuningdek, ko‘plab oliy ta’lim muassasalarida zamonaviy marketing dasturi mavjud emas. Chunki O‘zbekistonda katta bozor mavjud. Hamma ham buni to‘liq tushunib yetmayapti”, dedi Akrom Umarov.
Ma’lumot uchun, O‘zbekiston prezidenti 9-avgust kuni Ostona shahrida bo‘lib o‘tadigan Markaziy Osiyo davlatlari rahbarlarining navbatdagi Maslahat uchrashuvi va “Markaziy Osiyo + Yaponiya” muloqotining birinchi sammitida ham ishtirok etadi.
Izoh (0)