Исроил армияси 5 август куни Ғазода ҲАМАС ҳаракатининг батальон қўмондони Жобир Азиз, бир неча соат ўтиб эса Ливан жанубидаги ҳаво ҳужумида “Ҳизбуллоҳ” ҳаракати қўмондони Али Жамол Алдин Жавод ҳам ҳалок бўлганини маълум қилди.
Исроил армияси маълумотларига кўра, Жобир Азиз бир кун аввал, 4 август куни Ғазо секторидаги ҲАМАС қўмондонлик пункти жойлашган Ҳасан Саламе ва Носир мактабларига берилган зарба натижасида ҳалок бўлган. Қўмондон билан бирга бошқа ҳарбийлар ҳам ўлдирилган. Азиз 2020 йилдан бери ҲАМАСнинг ал-Фурқон батальонига қўмондонлик қилиб келган.
У 2023 йил октябрь ойида Исроилга қарши ҳужум режалаштирган ва уларда иштирок этган, дейди Исроил армияси.
Ливан жанубидаги Эбба ҳудудида “Ҳизбуллоҳ”нинг Радван махсус кучлари қўмондони Али Жамол Алдин Жавад ҳам ўлдирилган. Исроил армияси хабарга ҳужум акс этган видеони илова қилган. Унда Исроил армияси ҳаракатланаётган машинага ҳужум қилгани тасвирланган.
Изоҳ (0)