Joriy yil 2-avgust kuni Ozarbayjonda Milliy kino kuni nishonlandi. Shu munosabat bilan so‘nggi yillarda suratga olingan 5 ta yaxshi reytingga ega Ozarbajon filmlarini yodga oldik.
“Aporiya: qiyomat tajribasi” (2022)
Ushbu asar qo‘rqinchli janrda suratga olingan kamyob ozarbayjon filmlaridan biridir. Syujetga ko‘ra noma’lum bosqinchilar bir qishloqni egallab olishadi va olimlar bilan birgalikda odamlar ustida dahshatli tajribalar o‘tkazadi. Tadqiqot muvaffaqiyatsiz tugaganidan so‘ng, jinoyatchilar omon qolganlarni tog‘larda otib tashlaydi, ammo tajribada ishtirok etgan ikki shaxs ulardan qutulib qoladi: Arvin va Yejla tog‘ yonbag‘irlaridagi g‘orlardan birida yashirinib oladi. Tez orada yomg‘ir tufayli halok bo‘lganlarning jasadi mutatsiyaga uchraydi va zombilarga aylanadi.
“Mavsum oxiri” (2019)
Ba’zida qon-qarindoshlar ham bir tom ostida yashay olmaydi. Mahmud ismli o‘g‘il, Fidan ona va Zamir ota bir-birlaridan nafratlanadi, ularning hayoti tartibsizlik va tugamas janjallardan iborat. Ammo sohilga oilaviy sayohat qilgandan so‘ng barchasi o‘zgarib ketadi: Fidan ona tasodifan suvga g‘arq bo‘ladi va ota-bola uni topa olmaydi. Onaning g‘oyib bo‘lishi Mahmud va Zamirning taqdirini o‘zgartiradi. Endilikda ular o‘z hayotini oq qog‘ozdan boshlashi kerak.
“O‘limdan o‘limgacha” (2020)
Mazkur film 2020-yilda Venetsiya kinofestivali tanlovida ishtirok etgan. Davidning hayoti cheksiz qochishlardan iborat. U qallig‘i haqida yomon so‘zlar aytgan giyohvand moddalar sotuvchisini jahl ustida o‘ldirib qo‘yadi. Shu sababli David uning mafiyasidan yashirinishga urinadi. Bu vaqt davomida qahramon turli odamlar bilan uchrashadi va har bir insonga oz bo‘lsa-da, yordam berish orqali aybini yuvishga harakat qiladi.
“Baliqlarga xutba” (2022)
Dovud urushdan qaytganda u yashagan qishloqning deyarli barcha aholisi g‘ayrioddiy kasallikdan vafot etganining guvohi bo‘ladi. Faqatgina Dovudning singlisi tirik qoladi. U singlisini bu yerlardan ketishga ko‘ndirishga uzoq harakat qiladi, ammo qiz o‘lishini bilsa-da, o‘z qishlog‘ida qolishni istaydi.
“Xurmolar yetilganda” (2019)
Hujjatli film dunyoning nufuzli IDFA nomli badiiy filmlar festivalida namoyish etildi. Ozarbayjon qishloqlarining birida bir keksa ayol yashaydi, u doimo ikki o‘g‘li va qo‘shnilarining bolalari bog‘dagi xurmolarni terib ketishlarini kutadi. Ammo qariya oila a’zolari yana bir yil davomida bir-birlarini ko‘rmasliklariga to‘g‘ri keladi.
Izoh (0)