Ijtimoiy tarmoqlarda o‘zbek yulduzlari tomonidan yo‘lovchi poyezdlarida konditsioner tizimi ishlamayotgani haqidagi xabarlar keng muhokamalarga sabab bo‘ldi. “O‘ztermiyo‘lyo‘lovchi” holatga munosabat bildirib, bunga anomal issiq havo harorati sabab bo‘lganini bildirdi.
Qayd etilishicha, mazkur poyezd 12-iyul kuni Xiva—Andijon yo‘nalishida harakatlangan. Yo‘l davomida mazkur yo‘lovchi poyezdi vagonida texnik nosozlik aniqlangan bo‘lib, yo‘lovchilar vaqtincha boshqa vagonga o‘tkazilgan.
Ma’lumotlarga ko‘ra, ushbu yo‘lovchi vagon 1991-yilda qurilgan bo‘lib, o‘rnatilgan tartibda o‘z muddatlarida texnik taʼmirlardan o‘tkazilgan. Vagonga o‘rnatilgan sovitish tizimi, texnik shartlariga ko‘ra, tashqi havo harorati 40 darajadan yuqorilab ketganda, tizimning sovitish samaradorligi yo‘qoladi.
Hozirgi kunlarda mamlakatimiz hududi bo‘ylab kuzatilayotgan anomal issiq havo harorati tufayli ayrim vagonlarning sovitish tizimlarida nosozliklar kuzatilmoqda. Videolavhaga tushirilgan poyezdning yo‘l davomida havo harorati 40 darajadan yuqorilab ketgani sababli sovitish tizimining kompressor uskunasi ishlamay qolgan, natijada vagon sovitilmagan. Poyezd Toshkent Janubiy vokzaliga yetib kelganidan so‘ng, unga qo‘shimcha qilib soz holatdagi vagon ulandi va yo‘lovchilar ushbu vagonga o‘tkazildi, deyiladi munosabatda.
“O‘ztemiryo‘lyo‘lovchi” AJ o‘tgan asrlarda ishlab chiqarilgan yo‘lovchi vagonlarining sovitish tizimlari, ichki interyeri, elektr tizimlari bilan bog‘liq muammolarni bartaraf etish uchun kerakli choralarni ko‘rgan holda, sifatli bo‘lgan texnik jihozlarni o‘rnatish ishlari jadallik bilan olib borilayotganini va vagonlar bosqichma-bosqich modernizatsiya qilinayotganini, oxirgi bir yil davomida zamonaviy talablarga mos bo‘lgan 27 ta yo‘lovchi vagonlari xarid qilinganini maʼlum qildi.
Iqlimshunos Erkin Abdulahatov esa yil boshidan buyon O‘zbekistonda hali anomal issiqlik kuzatilmagani va “O‘zgidromet” ham bu borada hali ogohlantirish xabari eʼlon qilmaganini bildirdi.
Hukumatning 2021-yil 6-avgustdagi 501-sonli qarori 4b-ilovasida O‘zbekistonda qaysi payt anomal issiqlik yoki anomal sovuqlik kuzatilishi va bu kutilmalardan oldin “O‘zgidromet” ogohlantirish xabari ishlab chiqishi bo‘yicha aniq yozilgan jumlalar mavjud.
Izoh (0)