Эрон пойтахти Теҳронда 1 август куни ҲАМАС сиёсий бюроси раҳбари Исмоил Ҳаниянинг дафн маросими тадбирлари бошланган. Бу ҳақда Эрон маҳаллий нашрларига таяниб, Al Arabiya хабар берди.
Манбада айтилишича, Исмоил Ҳанияга бағишланган жаноза намозида Эрон Ислом Республикасининг Олий раҳбари Оятуллоҳ Али Хоманаий имомлик қилади. Маросимлар адо этилгач Исмоил Ҳания жасади дафн қилиш учун Қатарга юборилади.
Эрон расмийлари ҲАМАС раҳбарининг ўлдирилишини катта фожеа деб баҳолаган. Теҳрон жуда тез фурсатда Исроилга жавоб зарбаси бериши, қасос олиниши хабар қилинган.
“Унинг Эрон Ислом Республикаси ҳудудида шаҳид бўлганлиги сабабидан Исмоил Ҳания қони учун қасос олиш бизнинг бурчимиз”, деган Эрон Олий раҳбари Оятуллоҳ Али Хоманаий
ОАВ хабарига кўра, 1 август куни тонгда Теҳрон марказида Исмоил Ҳания сурати туширилган баннерлар ва Фаластин байроқлари кўтарилган. Пойтахт марказида жуда катта оломон йиғилган.
Теҳрондаги маросимлар тугагач, Ҳания жасадини Доҳада кутиб олиш учун ҳам катта тайёргарлик қилинган. Қатар пойтахтида ҲАМАС раҳбарияти вакиллари иштирокида дафн маросимлари давом эттирилиши айтилган.
Изоҳ (0)