BMT bosh kotibi Antoniu Guterrish Isroil armiyasining Bayrutga hujumi va HAMAS yetakchisi Ismoil Haniyaning Tehronda o‘ldirilganini tanqid qildi.
Bayrut janubi va Tehrondagi hujumlar barcha sa’y-harakatlar G‘azoda o‘t ochishni to‘xtatish va Isroil-Livan chegarasida tinchlik o‘rnatishga yo‘naltirilishi kerak bo‘lgan bir paytda xavfli kuchayishdan dalolat beradi, dedi uning matbuot kotibi Stefan Dyujarrik.
Uning so‘zlariga ko‘ra, Guterrish manfaatdor tomonlarni “barcha uchun uzoq muddatli tinchlik va barqarorlik o‘rnatish uchun mintaqadagi keskinlikni yumshatish uchun faol harakat qilishga” chaqirgan.
Yaponiyaning BMTdagi doimiy vakili o‘rinbosari Mitsuko Shino Yaqin Sharqda yirik harbiy mojaroning oldini olish uchun xalqaro sa’y-harakatlar amalga oshirilishini so‘ragan.
Biz mintaqa keng ko‘lamli urush yoqasida turganidan qo‘rqamiz, dedi u.
O‘z navbatida, Xitoyning BMTdagi doimiy vakili Fu Sun G‘azoda o‘t ochishni to‘xtatish kelishuviga erisha olmagani ziddiyatning kuchayishiga sabab bo‘lmoqda, deb hisoblagan. Uning fikricha, ko‘proq ta’sirga ega bo‘lgan davlatlar kuchliroq bosim o‘tkazishi va G‘azodagi urush alangasini o‘chirish uchun harakat qilishi kerak.
Britaniyaning BMTdagi doimiy vakili Barbara Vudvord G‘azoda zudlik bilan o‘t ochishni to‘xtatishga, davlatlarni vazminlikka chaqirgan.
Tinchlik sari yo‘l diplomatik muzokaralar orqali bo‘lishi kerak. Uzoq muddatli tinchlik bomba va o‘qlardan kelib chiqmaydi, deydi Vudvord.
Eronning BMTdagi doimiy vakili Amir Said Iravoniyga ko‘ra, Tehron doimiy ravishda maksimal darajada vazminlikni qo‘llagan, ammo qat’iy javob berish huquqini o‘zida saqlab qoladi. U Xavfsizlik kengashidan Isroilni qoralab, uni sanksiyalar bilan jazolashini so‘ragan.
Isroilning BMTdagi vakili o‘rinbosari Jonatan Miller BMT Xavfsizlik kengashini Eronni mintaqaviy terrorizmni qo‘llab-quvvatlayotgani uchun qoralashga va Tehronga qarshi sanksiyalarni kuchaytirishga chaqirgan.
Izoh (0)