Исроил армияси июль ойи давомида Ғазодаги 30 дан ортиқ қудуқни вайрон қилган. Бу ҳақда Al Arabiya нашри хабар берди.
Манбада айтилишича, сўнгги ойда Исроил Ғазо аҳолисини ичимлик ва егулик билан таъминлаб турган манбаларга кўплаб зарбалар берган. Ҳужумлардан мақсад эса гуманитар инқирозни кучайтириш, бу орқали ҲАМАСга босим ўтказиш бўлган.
Сув қудуқлари вайрон қилиниши билан боғлиқ энг ёмон вазият Хон Юнис шаҳрида рўй берган. Шаҳар маъмурияти вакили Салама Шурабнинг айтишича, 18-27 июль кунлари жанубдаги Рафаҳ ва Хон Юнис шаҳарларида Исроил кучлари томонидан ҳужумлар содир этилиши оқибатида ҳудуддаги сўнгги сув манбалари фойдаланиш учун яроқсиз ҳолга келган.
Исроил ҳукумати сув манбаларига уюштирилган ҳужумлар борасидаги журналистлар саволларига жавоб бермаган. Мамлакат мудофаа кучлари бош штаби ҳам ҳолатга муносабат билдиришдан бош тортган.
Сўнгги ҳафтада Ғазонинг денгизга туташ ғарбий соҳиллари атрофида маҳаллий аҳоли чучук сув манбаларини аниқлаган. Ушбу манбаларга етиш учун қудуқлар қазиш жараёнида эса Исроил самолётлари пайдо бўлиб, бомбалар улоқтирган.
Манбада айтилишича, Ғазо ҳудуди ҳозирда деярли барча сув ишлаб чиқариш қувватини йўқотган. Анклавдаги сув қудуқларининг 88 фоизи ва тузсизлантириш агрегатларининг 100 фоизи вайрон бўлган.
Халқаро ташкилотлар Исроилни гуманитар инқирозга олиб борувчи хатти-ҳаракатлар содир этмасликка чақирган. Инфратузилма объектларига ҳужумлар юзасидан ҳисобот сўралган.
Изоҳ (0)