Isroil armiyasi iyul oyi davomida G‘azodagi 30 dan ortiq quduqni vayron qilgan. Bu haqda Al Arabiya nashri xabar berdi.
Manbada aytilishicha, so‘nggi oyda Isroil G‘azo aholisini ichimlik va yegulik bilan taʼminlab turgan manbalarga ko‘plab zarbalar bergan. Hujumlardan maqsad esa gumanitar inqirozni kuchaytirish, bu orqali HAMASga bosim o‘tkazish bo‘lgan.
Suv quduqlari vayron qilinishi bilan bog‘liq eng yomon vaziyat Xon Yunis shahrida ro‘y bergan. Shahar maʼmuriyati vakili Salama Shurabning aytishicha, 18-27 iyul kunlari janubdagi Rafah va Xon Yunis shaharlarida Isroil kuchlari tomonidan hujumlar sodir etilishi oqibatida hududdagi so‘nggi suv manbalari foydalanish uchun yaroqsiz holga kelgan.
Isroil hukumati suv manbalariga uyushtirilgan hujumlar borasidagi jurnalistlar savollariga javob bermagan. Mamlakat mudofaa kuchlari bosh shtabi ham holatga munosabat bildirishdan bosh tortgan.
So‘nggi haftada G‘azoning dengizga tutash g‘arbiy sohillari atrofida mahalliy aholi chuchuk suv manbalarini aniqlagan. Ushbu manbalarga yetish uchun quduqlar qazish jarayonida esa Isroil samolyotlari paydo bo‘lib, bombalar uloqtirgan.
Manbada aytilishicha, G‘azo hududi hozirda deyarli barcha suv ishlab chiqarish quvvatini yo‘qotgan. Anklavdagi suv quduqlarining 88 foizi va tuzsizlantirish agregatlarining 100 foizi vayron bo‘lgan.
Xalqaro tashkilotlar Isroilni gumanitar inqirozga olib boruvchi xatti-harakatlar sodir etmaslikka chaqirgan. Infratuzilma obyektlariga hujumlar yuzasidan hisobot so‘ralgan.
Izoh (0)