Россия мудофаа вазири Андрей Белоусов америкалик ҳамкасби Ллойд Остин билан суҳбатда унга “жуда жиддий огоҳлантириш” берди. Бу ҳақда “ТАСС” хабар берди.
Россия ташқи ишлар вазири ўринбосари Сергей Рябков бу ҳақда маълумот берган. Дипломат огоҳлантириш Киев ва Вашингтон ҳаракатлари туфайли “назорат қилиб бўлмайдиган кескинлашув” ҳақида борганини айтди.
“Россия томони Вашингтоннинг бевосита иштирокисиз тасаввур қилиб бўлмайдиган, Киев томонидан юзага келиши мумкин бўлган янги провокациялар ҳақида жуда жиддий огоҳлантириш юборди. Ушбу огоҳлантириш бутунлай бошқариб бўлмайдиган оқибатларга олиб келадиган хавфли эскалациянинг олдини олиш учун қилинган”, деди Сергей Рябков.
Вазир ўринбосари Россия ва АҚШ вакиллари ўртасидаги барча алоқалар давлат ва дипломатик меъёрларга кўра, фақат утилитар мақсадларни кўзлашини айтган.
Андрей Белоусов ва Ллойд Остин ўртасидаги телефон суҳбати 12 июль куни бўлиб ўтди. The New York Times газетаси Россия мудофаа вазири ва Пентагон раҳбари суҳбатидан кўп ўтмай, томонлар Украинанинг Россияга қарши тайёрланаётган “махфий операцияси”ни муҳокама қилганини ёзди.
Изоҳ (0)