Исроил Мадримов: Қўллаб-қувватлашингизни сўраб қоламан

Супер ярим ўрта вазн тоифасида WBA камари соҳиби Исроил Мадримов 3 август куни Теренс Кроуфордга қарши жанг қилади.

Жанг олдидан Мадримов ўзбекистонлик мухлисларга мурожаат йўллади.

“Assalomу алайкум, ватандошлар. Мана ҳозир жанг бўладиган аренада турибмиз. 3 августда шу ердан ғалаба билан қайтишга ҳаракат қиламиз. Бунинг учун сизларнинг қўллаб-қувватлашингиз ва дуо қилишингизни сўраб қоламан.

Ўзбекистонимизга муносиб ғалабалар, камарлар билан қайтиш насиб қилсин. Олға, Ўзбекистон!”, — дейди Мадримов. 

Исроил ва Теренс ўртасидаги жанг Америка Қўшма Штатларининг Лос-Анжелес шаҳрида 3 август куни бўлиб ўтади. Исроил ва Теренс ўртасидаги қарама-қаршилик биринчи ўрта вазн тоифасидаги WBA камари учун кечади.

Теренс Кроуфорд профессионал рингда ўтказган 40 та жангининг барчасида ғалаба қозонган. Ғалабаларининг 31 тасига нокаут орқали эришган.

Мадримов эса 8 март оқшомида Саудия Арабистонининг Ар-Риёд шаҳрида россиялик Магомед Курбановни 5-раундда нокаутга учратиб, WBA камарини қўлга киритганди.