“Бу ажойиб” — Диёра Келдиёрованинг ғалабасини қўшни ва қардош халқлар қандай қарши олди?

28 июль куни дзюдо бўйича Ўзбекистон терма жамоаси аъзоси Диёра Келдиёрова -52 кг вазн тоифасида Париж Олимпиадасида ғолибликни қўлга киритди.

Диёра ўзбекистонлик дзюдочилар орасида биринчи бўлиб Олимпиада ғолибига айланди.

Ушбу ғалаба ижтимоий тармоқларда шов-шувга айланди. Ғалаба муносабати билан турли Марказий Осиё давлатлари нашри ўзбек қизининг ютуги билан табриклаб пост жойлади. 

“Қўшниларимиз тарихий ғалабага эришди: ўзбекистонлик дзюдочи Диёра Келдиёрова Олимпиада олтинини қўлга киритди.
Финалда ўзбекистонлик спортчи Токио—2020 Олимпиадаси чемпиони косоволик Дистрижа Красникини мағлуб этди. Дзюдочилар 52 килограммгача бўлган вазн тоифасида жанг ўтказди.
Эслатиб ўтамиз, бу Ўзбекистоннинг 2024 йилги ўйинлардаги илк медалидир. Шунингдек, Диёра дзюдо бўйича ўзбекистонлик илк Олимпия чемпиони бўлди.
Табриклаймиз”, деб ёзди Қозоғистон нашри Facebook ижтимоий тармоғида.

Ушбу табрик пости остида турли давлат фуқаролари ўзбек спортчисининг эришган ютуғини эътироф этди.

“Ўзбекистон, ғалаба билан! Қозоғистон қувончингизга шерик бўлмоқда” деб ёзди Нур Ая исмли фойдаланувчи.

“Озарбайжондан табриклар. Биз озарбайжонликлар ўзбек спортчисидан жуда хурсандмиз. Ўзбекистон спортчиларига бундан кейинги мусобақаларда ҳам ғалабалар тилаб қоламиз”, деб ёзади Элёр Небиев. 

“Қирғизистон сизнинг ғалабангиздан хурсанд. Табриклаймиз”, дейди Чинара Юсубалиева. 

“Дзюдо бўйича Париж мусобақасида қардош Ўзбекистонни биринчи олтин медали билан табриклаймиз”, деб ёзди Қирғизистон Республикаси Вазирлар Маҳкамаси раисининг ўринбосари Эдил Байсалов.

“Келинг 2 Олимпия олтин медали соҳиби ва франциялик Амандине Бучардни мағлуб этиб, дзюдо бўйича Ўзбекистоннинг илк олтин медалини қўлга киритган Диёра Келдиёровани олқишлайлик. У 5 йилдан бери мағлуб бўлмаган Ута Абега қарши баҳс олиб борди ва финалда Дистриа Красникини мағлуб этди. Бу Ажойиб”, деб ёзди журналист Греб Беачем.

“Турк дунёсининг Париж Олимпиадасида иккинчи олтин медалини ўзбекистонлик дзюдочи Диёра Келдиёрова қўлга киритди.

Табриклайман, Ўзбекистон” деб ёзди Турк дунёси културу саҳифаси.

Президент Шавкат Мирзиёев Ўзбекистон тарихида ёзги Олимпия ўйинларида аёллар ўртасида биринчи марта чемпион бўлган спортчи қизимизни тарихий ғалаба билан қизғин табриклаб, ота-онаси ва мураббийларига миннатдорлик билдирди.

Ўзбекистон Республикаси президенти ёрдамчиси Саида Мирзиёева ҳам Париж—2024 Олимпиадаси чемпиони дзюдочи Диёра Келдиёровани ғалаба билан табриклади.