Olmazor tumanidagi maktab oshxonalarida faoliyat yurituvchi tadbirkorlar hokimning oshxonaga aralashuvidan “dod” demoqda

Toshkent shahrining Olmazor tumanidagi umumta’lim maktablarida faoliyat yurituvchi tadbirkorlar maktab oshxonasi ishiga tuman hokimining aralashuvidan shikoyat qilmoqda. Bu haqda “Daryo”ga bildirganlarga ko‘ra, endilikda maktab oshxonalarida rahbariyatga taalluqli tadbirkorlar faoliyat yuritishi mumkin.

Yaqinda noma’lum shaxslar maktabimizga kelib, bu maktab oshxonasi bizga o‘tdi, ijaradagi tadbirkor oshxonani bo‘shatib qo‘yishi kerak. Nima olib kirishgan bo‘lsa, olib chiqib ketishsin, deyishibdi, deydi Olmazor tumanidagi 185-maktab oshxonasida faoliyat yurituvchi tadbirkor Mohira Jo‘rayeva. 

Suhbatdoshga ko‘ra, bu haqda u tuman hokimi bilan ham muloqot qilgan. 

Maktab rahbariyati bu haqda menga aytgach, o‘sha noma’lum kishilar biror-bir xat-hujjat ko‘rsatishdimi, deb so‘radim. Yo‘q deyishdi. Shu sabab bu gapga ishonmaganim uchun tuman hokimi qabuliga bordim. Hokim bu gapni tasdiqladi. Va tumandagi barcha maktablar bitta firmaga o‘tkazilayotganini bildirdi va keytering asosida ishlanishini aytdi. Shunda bu ovqatlar tekin bo‘ladimi, deb so‘radim. Yo‘q, dedi. Unda biz ham shu ishlarni qilyapmiz-ku, maktab oshxonasiga ancha pul tikkanmiz dedim, deydi hokim qabulida bo‘lgan murojaatchi. 

Murojaatchining bildirishicha, u besh yil avval maktab oshxonasida ish boshlagan bo‘lib, o‘tgan yillar davomida oshxonani qayta jihozlab, o‘quvchilarga ovqat tayyorlash uchun barcha shart-sharoitni yaratgan. 

“RayONO” talabi bilan qilgan barcha ishlarimiz va jihozlarni maktab balansiga o‘tkazib berganmiz. Endilikda bu yerdan chiqarib yuborilsak, ishsiz qolamiz. Bundan tashqari, uch nafar ishchim ham bekorchi bo‘lib qoladi. Ularning ham oilasi bor, deydi u. 

Tumandagi 249-maktab oshxonasida ishlovchi Yorqinoy Saidovaning ma’lumot berishicha, u faoliyat yuritayotgan tadbirkorlik subyekti maktab oshxonasini tark etsa, ishsiz qoladi. 

Oilada yagona boquvchiman. Yolg‘iz ona sifatida farzandimni maktab oshxonasida ishlab, o‘zim boqaman. Voyaga yetmagan farzandim shu maktabda o‘qiydi. Shu sabab ishimizni olib qo‘ymasliklarini, ishimizni davom ettirishimizni so‘rayman, deydi Yorqinoy Saidova. 

Tumandagi 159-maktabda faoliyat yurituvchi “Zokirxo‘ja-Ozodaxon” xususiy korxonasi direktori Shahzoda Abdukarimova ushbu maktabda 2013-yildan beri faoliyat yuritib kelayotganini, o‘tgan yillar davomida maktab oshxonasini tamoman yangilaganini, shu paytga qadar faoliyatidan hech kim norozi bo‘lmaganini aytmoqda. 

Maktablarda ovqatlanishni keytering tizimiga o‘tkazish bahonasida oshxonalarni boshqa tadbirkorga berishmoqchi bo‘lishyapti. Biz, to‘g‘risi, bu harakatni umuman tushunmayapmiz. Shu paytga qadar qanday talab qo‘yishsa, qonuniy bajarganmiz. Bu talablarini ham o‘zimiz bajarar edik. Lekin negadir bizni bu yerdan chiqarib yuborishmoqchi, deydi Shahzoda Abdukarimova. 

Murojaatchi tadbirkorlarga ko‘ra, tumanda 27 ta maktab oshxonasida faoliyat yurituvchi tadbirkorlar hokimning ushbu harakatidan norozi bo‘lmoqda. Faqat bu haqda hokimning shaxsan o‘ziga e’tiroz bildirishga qo‘rqadi. 

Hokim Xalq deputatlari tuman kengashining navbatdagi sessiyalarida bu masalani kiritib, deputatlar orqali bizning faoliyatimizga chek qo‘yishni va boshqa tadbirkorni maktab oshxonasiga kiritishni reja qilmoqda, deydi suhbatdoshlar.

Olmazor tuman Maktabgacha va maktab ta’limi bo‘limi mudiri Abdujamil Karimovning “Daryo”ga bildirishicha, maktab oshxonalaridagi ovqatlanishni keytering tizimiga o‘tkazish tashabbusi tuman hokimidan chiqqani rost. 

Bu shunchaki yangi tashabbus, hozircha. Bu haqda tumanimiz hokimi Toshkent shahar hokimiga ma’lum qilgan. Men esa shahar boshqarmasiga ma’lumot berdim. Ayni paytda bu haqda o‘ylayapmiz. Tashabbus amalga oshirilgan taqdirda ham, oshxonada savdo qilish huquqi tender orqali amalga oshiriladi. Tender savdosida ayni kungacha ishlab kelgan tadbirkorlar ham qatnashadi. Hech kimni norozi qilish niyatimiz yo‘q, dedi tuman Maktabgacha va maktab ta’limi bo‘limi mas’uli. 

“Daryo” jurnalisti bilan suhbatda bo‘lgan Xalq deputatlari Olmazor tuman kengashi deputati To‘rabek Nazarovning aytishicha, tadbirkorlarning hokim bu ishni deputatlar orqali amalga oshirmoqchi, degan iddaosi noto‘g‘ri.

Bugungi sessiyada ham, keyingilarida ham bu masala muhokama qilinishi rejalashtirilmagan. Biroq shunday tashabbus bor. Bu amalga oshirilishi uchun biz deputatlar avval o‘rganish olib borib, xulosa beramiz. Shu sabab hozirdan xulosa qilish noto‘g‘ri, dedi deputat. 

Tuman maktabgacha va maktab ta’limi bo‘limi mudiri ham ushbu masala sessiyada ko‘tarilayotganini inkor etdi.

“Daryo” mavzuga qaytadi.