Қрим Мухтор Республикасининг бош кардиологи Валерий Садовой 40 ёшдан ошган эркаклар ва 55 ёшдан ошган аёлларда тромбоз ва шу каби жиддий касалликлари хавфи юқори бўлиши ҳақида огоҳлантирди, дея хабар берди “Лиса.ru” нашри.
Шифокорнинг сўзларига кўра, ушбу ёш гуруҳига кирган барча инсонлар ёзнинг жазирама иссиғида тез-тез учрайдиган кўкрак қафаси ва юрак соҳасидаги оғриқлар, нафас олишда қийналиш каби аломатларни эътиборсиз қолдирмасликлари керак.
“Ушбу тоифадаги беморлар кўкрак қафасидаги илгари безовта қилмаган ва сабабсиз оғриқлар, юрак соҳасидаги санчишлар, кундалик жисмоний фаолиятни амалга оширганда ҳам нафас олишда қийналиш каби белгиларнинг пайдо бўлишини эътиборсиз қолдирмасликлари шарт”, деди кардиолог.
Бундан ташқари, шифокор юракнинг нотекис ёки тез уриши, бошдаги доимий оғриқлар, юз ва тананинг бир қисми ёки ярмининг увишиши, уйқусизлик ҳамда оёқ-қўлларнинг заифлашуви каби аломатларга эътибор беришни тавсия қилди.
Агар юқорида келтирилган белгилар ёки улардан бири пайдо бўлса ва аҳвол ёмонлаша бошласа, дарҳол шифокор қабулига ёзилиш ёки тез ёрдам чақириш лозим, чунки уй шароитида ўзбошимчалик билан даволаниш касалликни кучайтириб юбориши ва даволаниш жараёнини кечиктириши мумкин.
Изоҳ (0)