Ёз фаслида жазирама ҳаво тўлқинларидан нажот топиш истагида кўпчилик музқаймоқ истеъмол қилишга одатланган. Ушбу ширинликни севувчиларга шифокор-диетолог Татьяна Залетова ўз тавсияларини бериб ўтди.
Музқаймоқ юқори калорияли маҳсулот бўлиб, уни кунига 70-100 граммгача ейиш тавсия этилади, чунки 100 грамм қаймоқли музқаймоқда 180 килокалория, пломбирда эса 230-240 килокалория мавжуд. Шундай бўлса-да, мутахассиснинг фикрича, парҳезга риоя этадиганлар ўзларини музқаймоқдан чеклаши шартмас. Асосийси, кундалик меъёрга эътибор бериш кифоя.
Ўз вазнини доимий назорат қиладиган ва мунтазам парҳезга амал қиладиган шахсларга кунлик меъёр 70-100 граммни ташкил этади. Калорияларни ҳисобламайдиган қолган ширинликсеварлар бир кунда 2 та музқаймоқ истеъмол қилиши мумкин.
Музқаймоқлар ичида энг кам калориялиси бу мевали музқаймоқ бўлиб, уни уйда тайёрлаш ҳам мумкин. Бунинг учун блендерда меваларни эзиб, пюре ҳосил қилинг, сўнг массани силикон шаклларга солиб, музлаткичга бир неча соатга қўйинг.
Аммо музқаймоқ биз ўйлагандек танага совуқлик берадиган ва иссиқликдан халос этадиган маҳсулот эмас, чунки у организм совишига эмас, балки қизғин ишлашига сабаб бўлади.
Бундай ширинлик вақтинчалик салқинлик беради ва ошқозонга тушгандан сўнг, музқаймоқдаги юқори калория ҳазм қилиш тизимини жадал ишлашга ва кўпроқ энергия сарф қилишига ундайди.
Изоҳ (0)