Ҳуснбузарлар ва вазн йўқотиш: жигар касалликларининг ноодатий белгилари

Гастроэнтеролог ва терапевт Лилия Хабибулина жигар касалликларининг кўпчилик билмаган ва кенг тарқалмаган кўринишлари ҳақида маълумот берди.

Шифокор сўзларига кўра, жигар 500 га яқин ҳаёт учун зарур функцияларни бажаради. Жумладан, қонни филтрлайди, сафро ишлаб чиқариш ва метаболизмда иштирок этади, қон ивишини тартибга солади ҳамда оқсил ва витаминлар синтезида иштирок этади. Жигар бажарадиган вазифаларнинг хилма-хиллиги туфайли унинг фаолияти бузилганида организм ўзини қандай намоён қилиши турлича кечади.

Жигар касалликларининг умумий белгиларига тери ва кўз пардасининг сарғайиши, қичишиш, тери тошмалари ва кўкаришлар киради.

Шифокорнинг айтишича, жигар касалланганда қориннинг юқори қисмида ноқулайлик ёки оғриқ, кўнгил айниши, қусиш кузатилади. Шунингдек, елка ёки унинг орқа томонида оғриқлар ҳам пайдо бўлиши мумкин.

Жигар етишмовчилигининг қуйидаги белгилари ҳам мавжуд: ҳуснбузарлар тошиши, бўғимларда оғриқлар пайдо бўлиши, ичак, ўпка, қалқонсимон без ва буйрак касалликлари ривожланиши ҳамда ҳайз даврининг бузилиши кабилар.

Гастроэнтеролог Хабибулинанинг қўшимча қилишича, жигар хасталиги билан оғриган беморларда умумий безовталик, иштаҳанинг йўқолиши, иситма, вазн йўқотиш ва ҳолсизлик кузатилиши мумкин. Жигар жиддий касалланганда оёқлар шишади, қорин бўшлиғи катталашади, варикоз томирлари кенгаяди ва нафас олиш қийинлашади.