Qrim Muxtor Respublikasining bosh kardiologi Valeriy Sadovoy 40 yoshdan oshgan erkaklar va 55 yoshdan oshgan ayollarda tromboz va shu kabi jiddiy kasalliklari xavfi yuqori bo‘lishi haqida ogohlantirdi, deya xabar berdi “Lisa.ru” nashri.
Shifokorning so‘zlariga ko‘ra, ushbu yosh guruhiga kirgan barcha insonlar yozning jazirama issig‘ida tez-tez uchraydigan ko‘krak qafasi va yurak sohasidagi og‘riqlar, nafas olishda qiynalish kabi alomatlarni e’tiborsiz qoldirmasliklari kerak.
“Ushbu toifadagi bemorlar ko‘krak qafasidagi ilgari bezovta qilmagan va sababsiz og‘riqlar, yurak sohasidagi sanchishlar, kundalik jismoniy faoliyatni amalga oshirganda ham nafas olishda qiynalish kabi belgilarning paydo bo‘lishini e’tiborsiz qoldirmasliklari shart”, dedi kardiolog.
Bundan tashqari, shifokor yurakning notekis yoki tez urishi, boshdagi doimiy og‘riqlar, yuz va tananing bir qismi yoki yarmining uvishishi, uyqusizlik hamda oyoq-qo‘llarning zaiflashuvi kabi alomatlarga e’tibor berishni tavsiya qildi.
Agar yuqorida keltirilgan belgilar yoki ulardan biri paydo bo‘lsa va ahvol yomonlasha boshlasa, darhol shifokor qabuliga yozilish yoki tez yordam chaqirish lozim, chunki uy sharoitida o‘zboshimchalik bilan davolanish kasallikni kuchaytirib yuborishi va davolanish jarayonini kechiktirishi mumkin.
Izoh (0)