6—14 июль кунлари Германия ҳамкорлик ташкилоти (GIZ)нинг TVET академияси “Ўзбекистон касб-ҳунар таълими тизимидаги ислоҳотлар ва модернизация жараёнларини қўллаб-қувватлаш” лойиҳаси доирасида Германияда ўзбекистонлик профессионал таълим соҳасида фаолият олиб бораётган мутахассислар учун ўқув сафарини ташкил этди.
“Дуал таълим тарғиботчилари” деб номланган дастурда Олий таълим, фан ва инновациялар вазирлиги, Мактабгача ва мактаб таълими вазирлиги, Профессионал таълимни ривожлантириш институти, Меҳнат бозори тадқиқотлари институти, касб-ҳунар мактаблари, “Ўзчармсаноат” ва “Ўзтўқимачиликсаноат” уюшмаси вакилларидан иборат биринчи гуруҳ иштирокчилари қатнашди.
Сафарнинг дастлабки кунларида экспертлар EPIZ глобал таълим маркази, DGB (Германия касаба уюшмалари конфедерацияси) ва Берлин Сенати вакиллари билан учрашиб, уларнинг фаолияти билан яқиндан танишишди.
Қолаверса, иштирокчилар Берлин техника университети ҳамда Германия новвойлар академиясига ташриф буюриб, Германияда касбий ўқитувчиларни тайёрлаш бўйича махсус тақдимотни томоша қилишди. Семинар давомида ўқув жараёнларини бевосита кузатиш ҳамда талабалар билан суҳбатлашиш имкони ҳам берилди.
ОSZ Mode — Мода ва либослар техникумидаги ташриф давомида эса ушбу муассаса ҳамда Тошкентдаги Шайхонтоҳур касб-ҳунар коллежи ўртасида ҳамкорлик меморандуми имзоланди.
Шунингдек, ўқув сафари давомида Берлин Федерал касб-ҳунар таълими институти, Саноат палатаси ҳамда Christiani компетенсиялар марказида учрашувлар ташкил этилиб, ҳамюртларимиз соҳа вакилларидан профессионал таълим йўналишлари бўйича тажрибаларини ўрганишга муваффақ бўлишди.
Ушбу ўқув сафари бир сўз билан айтганда, профессионал таълим мутахассислари учун Германия тажрибасини яқинроқ ўрганиш ва унинг устун жиҳатларини аҳоли орасида тарғиб қилишга имкон беради. Дастурнинг иккинчи гуруҳ иштирокчилари учун ўқув сафари жорий йилнинг куз ойида Миср давлатида ташкил этилиши режалаштирилган.
Изоҳ (0)