6—14-iyul kunlari Germaniya hamkorlik tashkiloti (GIZ)ning TVET akademiyasi “O‘zbekiston kasb-hunar taʼlimi tizimidagi islohotlar va modernizatsiya jarayonlarini qo‘llab-quvvatlash” loyihasi doirasida Germaniyada o‘zbekistonlik professional ta’lim sohasida faoliyat olib borayotgan mutaxassislar uchun o‘quv safarini tashkil etdi.
“Dual ta’lim targ‘ibotchilari” deb nomlangan dasturda Oliy ta’lim, fan va innovatsiyalar vazirligi, Maktabgacha va maktab ta’limi vazirligi, Professional ta’limni rivojlantirish instituti, Mehnat bozori tadqiqotlari instituti, kasb-hunar maktablari, “O‘zcharmsanoat” va “O‘zto‘qimachiliksanoat” uyushmasi vakillaridan iborat birinchi guruh ishtirokchilari qatnashdi.
Safarning dastlabki kunlarida ekspertlar EPIZ global ta’lim markazi, DGB (Germaniya kasaba uyushmalari konfederatsiyasi) va Berlin Senati vakillari bilan uchrashib, ularning faoliyati bilan yaqindan tanishishdi.
Qolaversa, ishtirokchilar Berlin texnika universiteti hamda Germaniya novvoylar akademiyasiga tashrif buyurib, Germaniyada kasbiy o‘qituvchilarni tayyorlash bo‘yicha maxsus taqdimotni tomosha qilishdi. Seminar davomida o‘quv jarayonlarini bevosita kuzatish hamda talabalar bilan suhbatlashish imkoni ham berildi.
OSZ Mode — Moda va liboslar texnikumidagi tashrif davomida esa ushbu muassasa hamda Toshkentdagi Shayxontohur kasb-hunar kolleji o‘rtasida hamkorlik memorandumi imzolandi.
Shuningdek, o‘quv safari davomida Berlin Federal kasb-hunar ta’limi instituti, Sanoat palatasi hamda Christiani kompetensiyalar markazida uchrashuvlar tashkil etilib, hamyurtlarimiz soha vakillaridan professional ta’lim yo‘nalishlari bo‘yicha tajribalarini o‘rganishga muvaffaq bo‘lishdi.
Ushbu o‘quv safari bir so‘z bilan aytganda, professional ta’lim mutaxassislari uchun Germaniya tajribasini yaqinroq o‘rganish va uning ustun jihatlarini aholi orasida targ‘ib qilishga imkon beradi. Dasturning ikkinchi guruh ishtirokchilari uchun o‘quv safari joriy yilning kuz oyida Misr davlatida tashkil etilishi rejalashtirilgan.
Izoh (0)