Тошкент шаҳри Учтепа туманида бошқарув сервис компаниясидаги талон-торожлик фош этилди, деб хабар беради Бош прокуратура ҳузуридаги департамент.
Қайд этилишича, департаментнинг Учтепа туман бўлими томонидан терговга қадар текширув ўтказилган. Текширувда тумандаги “К.Ч.” ва “Б.” маҳаллалари аҳолисига хизмат кўрсатувчи “А.К.” МЧЖ бошқарув сервис компанияси масъул шахслари 2022 йилдан 2024 йил июлга қадар аҳолидан йиғилган жами 1,6 миллиард сўм маблағлар сарфлангани ҳақидаги чек, счёт-фактура, йўл варақаси, қайта ҳисоб-китоб қилиш ва бажарилган ишлар ҳақидаги далолатномаларни расмийлаштирмагани, шунингдек, МЧЖ ҳисоб рақамига кирим қилинган 604,4 миллион сўмни нақд кўринишда олиб, ўз эҳтиёжлари учун ишлатиб юборгани аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Ўзбекистонда иш ҳақи ва нафақа пулларининг 3,7 млрд сўми талон-торож қилингани аниқлангани, Сирдарёда боғча реконструкцияси учун ажратилган имтиёзли кредитнинг бир қисми талон-торож қилингани тўғрисида хабар берилганди.
Изоҳ (0)