Туркия ички ишларига қарашли Силиври депорт марказидан 34 нафар аёл озод этилиб, Ўзбекистонга қайтарилди. Бу ҳақда 10 июль куни Оила ва хотин-қизлар қўмитаси хабар берди.
Маълум қилинишича, хорижий мамлакатларда меҳнат муҳожири сифатида фаолият юритиб келаётган хотин-қизларни ҳимоя қилиш, улар ўртасида жиноятчилик содир этиш ҳолатларининг ва уларнинг одам савдоси қурбони бўлишининг олдини олиш ҳамда уларни мажбурий меҳнатга жалб қилиш ҳолатларига барҳам бериш мақсадида қўмита ташаббуси билан Сенат, ТИВ, ИИВ, Ташқи меҳнат миграцияси агентлиги вакилларидан иборат ишчи гуруҳ 21—25 апрель кунлари Туркияда сайёр қабуллар ташкил этди ва ноқонуний мигрантлар ҳолати ўрганилган.
Оила ва хотин-қизлар қўмитаси раиси ўринбосари Мукаррам Нурматова бошчилигидаги Ўзбекистон делегацияси Туркиянинг Истанбул ва Бурса шаҳарларида бўлиб, турли сабабларга кўра қийин ҳаётий вазиятга тушиб қолган ўзбекистонлик аёллар билан жойларда учрашувлар ўтказди.
Мазкур учрашувлар давомида 255 нафар аёлнинг муаммолари ўрганилди, тўрт нафар аёлга қонуний яшаш ҳуқуқини берувчи ҳужжатлар шакллантирилди, 100 дан ортиқ аёлга ҳуқуқий, 35 нафар аёлга моддий ёрдам кўрсатилди
Шунингдек, Туркия ички ишларига қарашли Силиври депорт марказидан 34 нафар аёл озод этилиб, ватанга қайтарилган, уч нафар аёл озодликка чиқарилди ҳамда икки нафар оғир аҳволдаги бемор Ўзбекистон Транспорт вазирлиги ҳамкорлигида тиббий хизмат кўрсатилган ҳолда Ўзбекистонга етказиб келинишига эришилди.
Изоҳ (0)