Давлат хавфсизлик хизмати ходимлари томонидан Тошкент шаҳрида банкдан пул ўғирламоқчи бўлган кибержиноятчилар ушланди.
Қайд этилишича, ДХХнинг Тошкент шаҳар бўйича бошқармаси ходимлари томонидан шаҳар Ички ишлар бош бошқармаси билан ҳамкорликда олиб борилган тезкор-қидирув тадбирлари натижасида, банк ҳисобрақамлари ҳамда банк иловасига уланган фуқароларнинг пластик карталарида сақланаётган пул маблағларини хакерлик ҳужуми орқали ноқонуний ўзлаштиришга уринган шахсларнинг қилмишлари фош этилди.
Хусусан, Тошкент шаҳридаги банклардан бирининг собиқ ходими ҳозирги кунда мазкур банкда мутахассис лавозимида ишловчи танишидан банкнинг дастурий таъминоти ва ҳисобрақамларига кириш имкониятини берувчи кодларни 6,5 минг доллар эвазига сотиб олади.
Сўнгра, у Наманган вилоятининг Тўрақўрғон туманида яшовчи, муқаддам фирибгарлик билан боғлиқ жиноятлари учун уч маротаба судланган 51 ёшли шахс ҳамда Тошкент вилоятининг Қибрай туманида истиқомат қилувчи 35 ёшли фуқаро билан ўзаро тил бириктириб, дастлаб банк ҳисобрақамларида ҳамда банк иловасига уланган фуқароларнинг пластик карталарида сақланаётган жами 370 миллиард сўм маблағни хакер жалб қилган ҳолда ўғирлашни, кейин эса оффшор ҳудудлар орқали чет элдаги танишларига тегишли ҳисобрақамларга ўтказишни режа қилган.
Қонунбузарлар 189 миллиард сўмни чет эл валютасига конвертация қилишга ва оффшор ҳудудлар орқали хориждаги ҳисобрақамига ўтказишга уринган вақтларида жиноят устида қўлга олинган.
Терговга қадар текширув давомида аниқланишича, улар ўз режалари амалга ошган тақдирда, гўёки банкнинг дастурий таъминотига чет элдан хакерлик ҳужуми бўлгани тўғрисида ёлғон маълумот тарқатишни режалаштиришган.
Ҳозирда ҳолат юзасидан мазкур шахсларга нисбатан Жиноят кодексининг 25, 169-моддаси 4-қисми “а” банди (ўғрилик) билан жиноят иши қўзғатилиб, қамоқ эҳтиёт чораси қўлланган.
Эслатиб ўтамиз, 2018 йилда Тошкентда банкдан салкам 90 минг доллар ўғирлаган “хакер” қўлга олинган эди. 2022 йилда эса Ўзбекистонлик хакер хорижий банклардан 50 миллион доллар ўғирлаганди.
Изоҳ (0)