Davlat xavfsizlik xizmati xodimlari tomonidan Toshkent shahrida bankdan pul o‘g‘irlamoqchi bo‘lgan kiberjinoyatchilar ushlandi.
Qayd etilishicha, DXXning Toshkent shahar bo‘yicha boshqarmasi xodimlari tomonidan shahar Ichki ishlar bosh boshqarmasi bilan hamkorlikda olib borilgan tezkor-qidiruv tadbirlari natijasida, bank hisobraqamlari hamda bank ilovasiga ulangan fuqarolarning plastik kartalarida saqlanayotgan pul mablag‘larini xakerlik hujumi orqali noqonuniy o‘zlashtirishga uringan shaxslarning qilmishlari fosh etildi.
Xususan, Toshkent shahridagi banklardan birining sobiq xodimi hozirgi kunda mazkur bankda mutaxassis lavozimida ishlovchi tanishidan bankning dasturiy taʼminoti va hisobraqamlariga kirish imkoniyatini beruvchi kodlarni 6,5 ming dollar evaziga sotib oladi.
So‘ngra, u Namangan viloyatining To‘raqo‘rg‘on tumanida yashovchi, muqaddam firibgarlik bilan bog‘liq jinoyatlari uchun uch marotaba sudlangan 51 yoshli shaxs hamda Toshkent viloyatining Qibray tumanida istiqomat qiluvchi 35 yoshli fuqaro bilan o‘zaro til biriktirib, dastlab bank hisobraqamlarida hamda bank ilovasiga ulangan fuqarolarning plastik kartalarida saqlanayotgan jami 370 milliard so‘m mablag‘ni xaker jalb qilgan holda o‘g‘irlashni, keyin esa offshor hududlar orqali chet eldagi tanishlariga tegishli hisobraqamlarga o‘tkazishni reja qilgan.
Qonunbuzarlar 189 milliard so‘mni chet el valyutasiga konvertatsiya qilishga va offshor hududlar orqali xorijdagi hisobraqamiga o‘tkazishga uringan vaqtlarida jinoyat ustida qo‘lga olingan.
Tergovga qadar tekshiruv davomida aniqlanishicha, ular o‘z rejalari amalga oshgan taqdirda, go‘yoki bankning dasturiy taʼminotiga chet eldan xakerlik hujumi bo‘lgani to‘g‘risida yolg‘on maʼlumot tarqatishni rejalashtirishgan.
Hozirda holat yuzasidan mazkur shaxslarga nisbatan Jinoyat kodeksining 25, 169-moddasi 4-qismi “a” bandi (o‘g‘rilik) bilan jinoyat ishi qo‘zg‘atilib, qamoq ehtiyot chorasi qo‘llangan.
Eslatib o‘tamiz, 2018-yilda Toshkentda bankdan salkam 90 ming dollar o‘g‘irlagan “xaker” qo‘lga olingan edi. 2022-yilda esa O‘zbekistonlik xaker xorijiy banklardan 50 million dollar o‘g‘irlagandi.
Izoh (0)