Марказий банк бошқарувининг “Тўлов тизими операторлари ва тўлов ташкилотлари фаолиятини лицензиялаш тартиби тўғрисидаги низомга ўзгартириш ва қўшимчалар киритиш ҳақида”ги қарори қабул қилинди.
Киритилган ўзгартиришга кўра, халқаро молия институтлари, чет эл тўлов тизими операторлари, тўлов ташкилотлари ва бошқа кредит ташкилотлари ҳисобланмайдиган норезидент юридик шахслар ҳамда норезидент жисмоний шахсларнинг тўлов тизими операторлари ва тўлов ташкилоти устав фондидаги (устав капиталидаги) жами улуши 50 фоиздан ошмаслиги керак.
Ушбу низом мақсадларида бошқа кредит ташкилотлари деганда қуйидагилар тушунилади:
- молиявий фаолият турларини амалга оширувчи компанияларни бошқариш мақсадида ташкил этилган холдинг компанияси (бошқарув компанияси);
- ваколатли давлат органининг лицензияси (рухсатномаси) асосида молиявий фаолият турларидан бирини амалга оширувчи ва жойлашган (рўйхатга олинган) давлатида консолидациялашган назорат мавжуд бўлган юридик шахслар.
Шунингдек, низом мақсадларида қуйидаги фаолият турлари молиявий фаолият турлари ҳисобланади:
- банк фаолияти;
- микромолиялаш фаолияти;
- суғурта фаолияти;
- лизинг фаолияти;
- ипотекани қайта молиялаш фаолиятини амалга ошириш.
Халқаро молия инситутлари, чет эл тўлов тизими операторлари, тўлов ташкилотлари ва бошқа кредит ташкилотлари ҳисобланувчи норезидент юридик шахслар Ўзбекистонда тўлов тизими оператори ёки тўлов ташкилоти устав фондининг (устав капиталининг) 50 фоиздан ортиқ улушига эга бўлиши учун ушбу ташкилотларнинг устав фонди 20 миллион евро эквивалентидан кам бўлмаслиги кераклиги белгиланди.
Эслатиб ўтамиз, 2023 йил сентябрь бошида Ўзбекистон Марказий банки ижтимоий тармоқларда тўлов ташкилотлари учун трансчегаравий пул ўтказмаларига доир ўрнатилаётган чекловлар юзасидан тарқатилаётган хабарларга муносабат билдирганди.
Изоҳ (0)