Туркиянинг турли шаҳарларида муҳожирларга қарши погром ва намойишлар бўлиб ўтмоқда. Маҳаллий аҳоли кўчаларга чиқиб, мигрантларни депортация қилишни, президент Эрдўғондан эса истеъфога чиқишни талаб қилган.
Намойишларга суриялик эркак 5 ёшли болага нисбатан зўравонлик ҳаракатлари содир этгани сабаб бўлган. Мазкур ҳодиса туфайли ғазабланган маҳаллий аҳолининг бир гуруҳи суриялик қочқинларга тегишли дўконлар, уйлар ва машиналарни ёқиб юборган ва уларга тошлар отган. Тартибсизликлар 30 июнь куни тунда бошланган. Болага нисбатан зўравонлик қилган суриялик эркак қўлга олинган, бола эса ҳимояда экани айтилмоқда.
Полиция оломонни тарқатиш учун кўздан ёш оқизувчи газ ишлатган, тўқнашувда 14 нафар хавфсизлик кучлари ва бир ўт ўчирувчи яраланган.
Туркия ички ишлар вазири Али Ерликая 67 киши ҳибсга олинганини айтган. Туркия президенти Ражаб Тоййиб Эрдўғон мухолифатни зўравонликларни қўзғатганликда айблаган.
Мазкур намойишларга жавобан Суриянинг 7 та шаҳрида Туркияга қарши намойишлар бўлиб ўтган, у ерда Туркия байроқлари ва ҳатто Туркия давлат рақамлари бўлган юк машиналари ёқиб юборилган. Натижада 7 киши ҳалок бўлган, 25 киши яраланган.
Изоҳ (0)