Испания қурилиш секторига Ўзбекистондан ишчилар жалб қилиниши мумкин. Бу ҳақда “Дунё” хабар берди.
Маълум қилинишича, Ўзбекистон элчиси Фаррух Турсунов Испания Қурувчилар миллий уюшмаси президенти Педро Фернандес Ален билан музокара ўтказди. Унда Ўзбекистон ва Испания ўртасида ташқи меҳнат миграцияси соҳасида ҳамкорлик алоқаларини йўлга қўйиш ва ушбу мамлакат қурилиш секторига фуқароларни ишга жалб қилиш имкониятлари муҳокама қилинди.
Хориж томонига сўнгги йилларда мамлакатда тартибли ва хавфсиз ташқи меҳнат миграцияси соҳасида амалга оширилаётган ислоҳотлар ҳақида сўзлаб берилди. Шунингдек, фуқароларни хорижий иш берувчилар талабларига кўра, турли соҳаларда ўқитиш ва малакасини ошириш бўйича яратилган шарт-шароитлар таъкидланди.
Ўзбекистон ва Европанинг етакчи мамлакатлари ўртасида ушбу йўналишда аниқ натижаларга эришилгани урғуланди. Ўз навбатида, Педро Фернандес Ален Ўзбекистонда ташқи меҳнат миграцияси соҳасида амалга оширилган ишларга юқори баҳо берди.
Унинг айтишича, Ўзбекистон фуқаролари учун хорижий мамлакатларда хавфсиз ва тартибли меҳнат фаолиятини олиб бориш учун барча имкониятлар яратилгани ривожланаётган давлатларнинг ижобий кўрсатгичларидан бири ҳисобланади.
Қурувчилар миллий уюшмаси президенти Испанияда қурилиш соҳасида катта режалар борлигини, хусусан, 200 мингта давлат кўчмас мулк объектларини барпо этиш ҳамда ушбу биноларни қуриш учун 700 минг нафар ишчиларни жалб қилиш кўзда тутилганини маълум қилди.
Музокаралар якунида ушбу йўналишда ҳамкорлик қилиш юзасидан келишувга эришилди.
Изоҳ (0)