PUBG’га муккасидан кетган, мотоциклларни яхши кўрадиган ва паста тайёрлайдиган Ислом Махачев ҳақида

АҚШнинг Нью-Жерси штатида Ўзбекистон вақти билан 2 июнь тонгида UFC 302 мусобақаси бўлиб ўтди. 

Енгил вазн тоифасида амалдаги UFC чемпиони Ислом Махачев турнирнинг асосий жангида Дастин Порьега қарши жанг қилди ва ғалаба қозонди. Шу тариқа доғистонлик спортчи учинчи бор ўз камарини ҳимоя қилди.

Исломнинг кўпчилик мухлисларга нотаниш бўлган қирралари ҳам мавжуд. Қуйида спортчи “Sports” сайтининг қатор саволларга жавоб бериб ўтди.

Машғулотлар вақтида спарринг шерикларингизни аяр экансиз?

Баъзан AKA (American Kickboxing Academy) залига борганингда, у ерда янги одам турган бўлади. У билан беш дақиқа спарринг тушамиз, у эса дарҳол ниманидир исботлашга тушади, кучли зарбалар беради. Бундай инсонларни тинчлантириш лозим. 

Ўзимнинг залимда бунга йўл қўймайман. Баъзи жангчилар ўз фаолиятини спаррингларда якунлайди. Мен эҳтиёткор ва техник ишлашни ёқтираман. Ҳамма ҳам оёқда ва қўлларда зарба бера олади. Лекин жангда ким ақлини ишлатса, ўша ғалаба қозонади. 

Сиз хотиржам одамсиз. Ўзингизни Конорга қарши жангдан сўнг унинг жамоаси томонга ташланган Ҳабибнинг ўрнига қўйиб кўра оласизми?

Идеал одамман, ҳар доим ўзимни назорат қиламан дея олмайман. Ҳар қандай одам ўзини йўқотиб қўйиши мумкин. Сенинг ғурурингга ва шаънингга тегишса, жим ўтира олмайсан. 

Спортчилар ўз жангларига фарзандларини олиб боришига муносабатингиз қандай?

Буни қўллаб-қувватламайман. У ер жуда шовқинли жой ва болалар учун эмас. Ундан ташқари жанглар ярим тунда бўлиб ўтади, бу вақтда эса болалар ухлаши керак.

Бола буни кўриши керак деб ҳисобламайман. Катта бўлганидан сўнг, видеотакрорлардан кўриб олиши мумкин. Жанг вақтида қон бўлиши ҳам мумкин. Буни ҳам бола кўриши керак эмас.

Агар қизингиз MMA билан шуғулланишни истаса, рухсат берган бўлармидингиз?

100% йўқ деб жавоб бераман. Ҳа, спорт ривожланиш учун, координация учун керак, лекин MMA... 

Фарзандли бўлганингиздан сўнг ҳаётингизда нималар ўзгарди?

Масъулият ошди, баъзи лаҳзаларда кўпроқ ўйлайдиган бўлдим. Менинг фаолиятим хатарли. Гоҳида “нега таваккал қиласан, уйда оиланг кутяпти-ку?”, деб ўзимга-ўзим гапираман.

Агар 1-синф пайтингизда сизга ким бўлишни орзу қилишингиз ҳақида савол берилганда нима деб жавоб берган бўлардингиз?

Кимдир космонавт бўлишни орзу қилган, аммо менда бунақа орзу бўлмаган. Машинам бўлишини хоҳлаганман. Қишлоқда фақат отда сайр қилардим.

Тўғрисини айтсам... Мени жуда яхши шифокор операция қилган. Унинг одамларга яхшилик қилишини кўриб, мен ҳам худди шундай одамларга ёрдам берадиган инсон бўламан дегандим.

Уни ҳамма ҳурмат қиларди, бу эса менга ёқарди. Ҳалигача ўша шифокорни кўриб тураман, унга ҳурматим жуда баланд.

Экстремал спортни яхши кўрасиз. Бунда энг қўрқинчлиси қайси?

Парашютдан сакраш. Энди бу ишни такрорламайман — хавфли ва жуда ёқимли бўлмаган. Қўрқинчли эмасди. Биринчи қадам ҳаяжонли бўлади, учиб бўлганингдан сўнг ерга хавфсиз қўниб олиш ҳақида ўйлай бошлайсан.

Ҳали уйланмаган вақтимда, қоядан сакраш ҳақида ўйлардим. Кейин эса бу жуда хавфли спорт тури эканлигини тушундим. 

Экстремал спорт тури туфайли ўлимга ҳам яқин пайтингиз бўлганми?

Йўқ, бунгача бормайман. Ҳаёт бизга инъом қилиб берилган, инсон уни ҳиссиётлар туфайли хавф остига қўйиши мумкин эмас. Мотоцикл минаман, кўп иш қиламан. Лекин чегарадан ошмайман.

Масалан, шаҳарда ҳам мототциклим бор, бироқ уни деярли минмайман. Шаҳарда ҳамма нарса фақат ўзингга боғлиқ бўлмайди. Автомобиль ҳайдовчилари мотоциклни тўсатдан йўлда тўхтаб қолиши мумкин бўлган велосипед деб ўйлашади. Улар сенинг йўлингни тўсиб, ҳурмат қилмайди.

Доғистонда ҳали мототциклга ўрганишмади, шунинг учун таслим бўлдим. Менинг Harley-Davidson’им шунчаки гаражда турибди.

Мотоциклларга муҳаббат қаердан? Абдулманап Нурмагомедовга сизнинг севимли машғулотларингиз ёқмаслиги ҳақида гапиргандингиз.

Мотоциклларни коронавируснинг илк тўлқини вақтида ёқтириб қолгандим. Мураббийим шифохонада ётганида, мен мототцикл ҳайдай бошладим. Шаҳар ёпиқ, одамлар бир жойга тўпланмаган, ҳамма масофа сақлаб юрарди.

Дўстим билан бирга ўрмонга, тоғларга чиқа бошладик. Бу менга ёқиб қолди ва тез-тез мотоциклда сайр қила бошладим. Агар мураббийим касалхонадан чиққанида, мен мототциклни сотиб юборишимга тўғри келарди. У бунга умуман рухсат бермаслиги аниқ эди. 

Инглиз тилини фильмлардан ўрганганингизни айтгандингиз. Қандай фильмларни ёқтирасиз?

Тўғриси, жуда кам кино кўраман, айниқса, уларни инглиз тилида кўриш қийин. Баъзи жойларини тўхтатиш керак, нима ёзилганини ўқиш улгурмай қолардим. Бу эса мени асабимни бузарди. Кейинчалик бу ишни қилмай қўйдим, репетиторга қатнай бошладим.

Агар ҳозир YouTube’га кирилса, сизнинг экрангизда қандай видеолар тавсияда турган бўлади?

Менимча, кўпроқ овқатлар ҳақида видеолар чиқади. 

Овқат тайёрлашни биласизми? Сўнгги бор қачон ошхонада бўлган эдингиз?

Яқинда стейк қилдим. Яна паста тайёрладим. Шунчаки макарон ва алоҳида пакетда соус сотиб олдим.
Макаронни қайнатдим. Ҳеч қандай қийинчилик жойи йўқ. Пиёз, қўзиқорин ва саримсоқни қовуриб олдим ва устида соусни қуйдим. Жуда мазали таом бўлди.

Ижтимоий тармоқларга бир кунда қанча вақт сарфлайсиз?

Бу борада ўзимни жуда қаттиқ назорат қиламан. 2-3 соат ижтимоий тармоқларда ўтиришни ўрнига бирор фойдали иш билан шуғулланиш мумкин. 

Атрофимни кўпчилик телефонга боғланиб қолганини кўраман. Шунда ўйлайман: “Вақтни қандай қилиб беҳуда сарфлаш мумкин?”. Уйимда компьютер йўқ, баъзан дарслар учун ноутбукимдан фойдаланиб тураман.

Видеоўйинлар-чи?

Карантин вақтида PUBG ўйнашни бошладим. Ўша вақтда бу жуда машҳур ўйин эди.
Қачон бу меники эмаслигини тушуниб етдим? Карантин, мен ойлар давомида ушбу ўйинни ўйнаяпман ва Рамазон бошланди. Бу ойда сиз қўлингиздан келгунча яхши ишлар қилишингиз, вақтингизни фойдали нарсаларга сарфлашингиз лозим.

Рамазоннинг илк кунини ҳам компьютер қаршисида ўтказгандим. Кейин эса дўстимга қўнғироқ қилиб: “Буни олиб кет”, дегандим. Шундан буён уйимда компьютер йўқ.