AQSHning Nyu-Jersi shtatida O‘zbekiston vaqti bilan 2-iyun tongida UFC 302 musobaqasi bo‘lib o‘tdi.
Yengil vazn toifasida amaldagi UFC chempioni Islom Maxachev turnirning asosiy jangida Dastin Poryega qarshi jang qildi va g‘alaba qozondi. Shu tariqa dog‘istonlik sportchi uchinchi bor o‘z kamarini himoya qildi.
Islomning ko‘pchilik muxlislarga notanish bo‘lgan qirralari ham mavjud. Quyida sportchi “Sports” saytining qator savollarga javob berib o‘tdi.
Mashg‘ulotlar vaqtida sparring sheriklaringizni ayar ekansiz?
Ba’zan AKA (American Kickboxing Academy) zaliga borganingda, u yerda yangi odam turgan bo‘ladi. U bilan besh daqiqa sparring tushamiz, u esa darhol nimanidir isbotlashga tushadi, kuchli zarbalar beradi. Bunday insonlarni tinchlantirish lozim.
O‘zimning zalimda bunga yo‘l qo‘ymayman. Ba’zi jangchilar o‘z faoliyatini sparringlarda yakunlaydi. Men ehtiyotkor va texnik ishlashni yoqtiraman. Hamma ham oyoqda va qo‘llarda zarba bera oladi. Lekin jangda kim aqlini ishlatsa, o‘sha g‘alaba qozonadi.
Siz xotirjam odamsiz. O‘zingizni Konorga qarshi jangdan so‘ng uning jamoasi tomonga tashlangan Habibning o‘rniga qo‘yib ko‘ra olasizmi?
Ideal odamman, har doim o‘zimni nazorat qilaman deya olmayman. Har qanday odam o‘zini yo‘qotib qo‘yishi mumkin. Sening g‘ururingga va sha’ningga tegishsa, jim o‘tira olmaysan.
Sportchilar o‘z janglariga farzandlarini olib borishiga munosabatingiz qanday?
Buni qo‘llab-quvvatlamayman. U yer juda shovqinli joy va bolalar uchun emas. Undan tashqari janglar yarim tunda bo‘lib o‘tadi, bu vaqtda esa bolalar uxlashi kerak.
Bola buni ko‘rishi kerak deb hisoblamayman. Katta bo‘lganidan so‘ng, videotakrorlardan ko‘rib olishi mumkin. Jang vaqtida qon bo‘lishi ham mumkin. Buni ham bola ko‘rishi kerak emas.
Agar qizingiz MMA bilan shug‘ullanishni istasa, ruxsat bergan bo‘larmidingiz?
100% yo‘q deb javob beraman. Ha, sport rivojlanish uchun, koordinatsiya uchun kerak, lekin MMA...
Farzandli bo‘lganingizdan so‘ng hayotingizda nimalar o‘zgardi?
Mas’uliyat oshdi, ba’zi lahzalarda ko‘proq o‘ylaydigan bo‘ldim. Mening faoliyatim xatarli. Gohida “nega tavakkal qilasan, uyda oilang kutyapti-ku?”, deb o‘zimga-o‘zim gapiraman.
Agar 1-sinf paytingizda sizga kim bo‘lishni orzu qilishingiz haqida savol berilganda nima deb javob bergan bo‘lardingiz?
Kimdir kosmonavt bo‘lishni orzu qilgan, ammo menda bunaqa orzu bo‘lmagan. Mashinam bo‘lishini xohlaganman. Qishloqda faqat otda sayr qilardim.
To‘g‘risini aytsam... Meni juda yaxshi shifokor operatsiya qilgan. Uning odamlarga yaxshilik qilishini ko‘rib, men ham xuddi shunday odamlarga yordam beradigan inson bo‘laman degandim.
Uni hamma hurmat qilardi, bu esa menga yoqardi. Haligacha o‘sha shifokorni ko‘rib turaman, unga hurmatim juda baland.
Ekstremal sportni yaxshi ko‘rasiz. Bunda eng qo‘rqinchlisi qaysi?
Parashyutdan sakrash. Endi bu ishni takrorlamayman — xavfli va juda yoqimli bo‘lmagan. Qo‘rqinchli emasdi. Birinchi qadam hayajonli bo‘ladi, uchib bo‘lganingdan so‘ng yerga xavfsiz qo‘nib olish haqida o‘ylay boshlaysan.
Hali uylanmagan vaqtimda, qoyadan sakrash haqida o‘ylardim. Keyin esa bu juda xavfli sport turi ekanligini tushundim.
Ekstremal sport turi tufayli o‘limga ham yaqin paytingiz bo‘lganmi?
Yo‘q, bungacha bormayman. Hayot bizga in’om qilib berilgan, inson uni hissiyotlar tufayli xavf ostiga qo‘yishi mumkin emas. Mototsikl minaman, ko‘p ish qilaman. Lekin chegaradan oshmayman.
Masalan, shaharda ham mototsiklim bor, biroq uni deyarli minmayman. Shaharda hamma narsa faqat o‘zingga bog‘liq bo‘lmaydi. Avtomobil haydovchilari mototsiklni to‘satdan yo‘lda to‘xtab qolishi mumkin bo‘lgan velosiped deb o‘ylashadi. Ular sening yo‘lingni to‘sib, hurmat qilmaydi.
Dog‘istonda hali mototsiklga o‘rganishmadi, shuning uchun taslim bo‘ldim. Mening Harley-Davidson’im shunchaki garajda turibdi.
Mototsikllarga muhabbat qayerdan? Abdulmanap Nurmagomedovga sizning sevimli mashg‘ulotlaringiz yoqmasligi haqida gapirgandingiz.
Mototsikllarni koronavirusning ilk to‘lqini vaqtida yoqtirib qolgandim. Murabbiyim shifoxonada yotganida, men mototsikl hayday boshladim. Shahar yopiq, odamlar bir joyga to‘planmagan, hamma masofa saqlab yurardi.
Do‘stim bilan birga o‘rmonga, tog‘larga chiqa boshladik. Bu menga yoqib qoldi va tez-tez mototsiklda sayr qila boshladim. Agar murabbiyim kasalxonadan chiqqanida, men mototsiklni sotib yuborishimga to‘g‘ri kelardi. U bunga umuman ruxsat bermasligi aniq edi.
Ingliz tilini filmlardan o‘rganganingizni aytgandingiz. Qanday filmlarni yoqtirasiz?
To‘g‘risi, juda kam kino ko‘raman, ayniqsa, ularni ingliz tilida ko‘rish qiyin. Ba’zi joylarini to‘xtatish kerak, nima yozilganini o‘qish ulgurmay qolardim. Bu esa meni asabimni buzardi. Keyinchalik bu ishni qilmay qo‘ydim, repetitorga qatnay boshladim.
Agar hozir YouTube’ga kirilsa, sizning ekrangizda qanday videolar tavsiyada turgan bo‘ladi?
Menimcha, ko‘proq ovqatlar haqida videolar chiqadi.
Ovqat tayyorlashni bilasizmi? So‘nggi bor qachon oshxonada bo‘lgan edingiz?
Yaqinda steyk qildim. Yana pasta tayyorladim. Shunchaki makaron va alohida paketda sous sotib oldim.
Makaronni qaynatdim. Hech qanday qiyinchilik joyi yo‘q. Piyoz, qo‘ziqorin va sarimsoqni qovurib oldim va ustida sousni quydim. Juda mazali taom bo‘ldi.
Ijtimoiy tarmoqlarga bir kunda qancha vaqt sarflaysiz?
Bu borada o‘zimni juda qattiq nazorat qilaman. 2-3 soat ijtimoiy tarmoqlarda o‘tirishni o‘rniga biror foydali ish bilan shug‘ullanish mumkin.
Atrofimni ko‘pchilik telefonga bog‘lanib qolganini ko‘raman. Shunda o‘ylayman: “Vaqtni qanday qilib behuda sarflash mumkin?”. Uyimda kompyuter yo‘q, ba’zan darslar uchun noutbukimdan foydalanib turaman.
Videoo‘yinlar-chi?
Karantin vaqtida PUBG o‘ynashni boshladim. O‘sha vaqtda bu juda mashhur o‘yin edi.
Qachon bu meniki emasligini tushunib yetdim? Karantin, men oylar davomida ushbu o‘yinni o‘ynayapman va Ramazon boshlandi. Bu oyda siz qo‘lingizdan kelguncha yaxshi ishlar qilishingiz, vaqtingizni foydali narsalarga sarflashingiz lozim.
Ramazonning ilk kunini ham kompyuter qarshisida o‘tkazgandim. Keyin esa do‘stimga qo‘ng‘iroq qilib: “Buni olib ket”, degandim. Shundan buyon uyimda kompyuter yo‘q.
Izoh (0)