Тошкент шаҳри, Қашқадарё ва Андижон вилоятларида ҳайдовчилик гувоҳномаси ноқонуний йўллар билан олиб беришни ваъда қилган шахслар ушланди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Яшнобод туман бўлими томонидан ДХХ ходимлари билан ҳамкорликда тезкор тадбир ўтказилган. Тадбирда Ж.Н. исмли шахс фуқаро М.И.га 1,5 минг доллар эвазига юқори лавозимда ишловчи танишлари ёрдамида ҳеч қандай имтиҳонларсиз ҳайдовчилик гувоҳномасини олиб беришини айтиб, олдиндан 750 долларни олган вақтида ашёвий далиллар билан ушланган.
Шу каби, департаментнинг Деҳқонобод туман бўлими ва вилоят бошқармаси ходимлари ҳамкорлигида ўтказилган тезкор тадбирда Ш.О. исмли шахс фуқаро С.У. ва унинг таниши Ж.Т. лар ҳайдовчилик гувоҳномаси олиш учун ўқимаган бўлсада, мудофаага кўмаклашувчи “Ватанпарвар” ташкилотида ишловчи ўзининг танишлари ёрдамида 6 ой ўқигани ҳақида тегишли ҳужжат расмийлаштириб бериши эвазига 7,2 миллион сўмни олган вақтида ашёвий далиллар билан қўлга тушган.
Департаментнинг Шаҳрихон туман бўлими ва ИИБ ходимлари ҳамкорлигида ўтказилган тезкор тадбирда эса “А.И.Т.” МЧЖ автомактаби ўргатувчи устаси Б.Ж. фуқаро И.И.га “Б.” тоифали ҳайдовчилик гувоҳномасини олиб беришини ваъда қилиб, эвазига 650 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан олдин Тошкент вилоятида сохта сертификат эвазига ҳайдовчилик гувоҳномаси олган фуқарога суд ҳукми ўқилганди. Унга Жиноят кодексининг 59-моддасига асосан тайинланган жазоларни қисман қўшиш йўли билан узил-кесил ўташ учун иш ҳақининг 20 фоизини давлат даромади ҳисобига ушлаб қолган ҳолда 2,5 йил муддатга ахлоқ тузатиш ишлари жазоси тайинланган. Май ўрталарида Фарғонада 200 долларга “права” олиб беришни ваъда қилган автомактаб раҳбари ушланганди.
Изоҳ (0)